Estabilidade de casos activos nos centros educativos galegos e baixan as aulas pechadas a 28
Aumentan a dous os centros pechados pola incidencia do virus: dúas escolas infantís en Santiago e A Cañiza.
Por E.P. | Santiago de Compostela | 19/05/2021 | Actualizada ás 13:44
Os casos activos de Covid-19 en centros educativos non universitarios e escolas infantís de Galicia mantéñense, á volta da ponte das Letras Galegas, en 579, mentres que as aulas pechadas baixaron a 28 -catro menos-. Ademais, a Comunidade galega conta con dúas escolas infantís pechadas pola incidencia deste coronavirus.
Segundo os datos actualizados este mércores polas consellerías de Educación e Sanidade, á escola infantil Santa Susana de Santiago -por tres contaxios- súmaselle como centro pechado a EIM A Cañiza por un positivo.
Por áreas sanitarias, os casos redúcense nas de Pontevedra (-9), Vigo (-4), Santiago (-3); mentres que aumentan nas de Lugo (+7), Ourense (+7) e Ferrol (+2); e mantéñense na da Coruña.
A área de Vigo continúa á cabeza con 184 casos de coronavirus activos -catro menos- e 16 aulas pechadas -unha máis-. O centro con máis contaxios é a escola infantil Santa Isabel da cidade olívica, con nove e dúas aulas pechadas, mentres que o IES de Mos conta con oito positivos. A área viguesa conta, así mesmo, cun centro pechado pola incidencia da Covid-19: a escola infantil EIM A Cañiza debido a un positivo.
Séguelle a área da Coruña, que mantén 154 casos e reduce a catro as aulas pechadas -unha menos-, dúas delas no CEIP Plurilingüe Isidro Parga Pondal de Oleiros por 26 positivos -un menos-, o maior número de Galicia. Pola súa banda, o CPR plurilingüe Fillas de Jesús concentra 19 contagios.
Na área de Pontevedra as infeccións activas caen a 83 -nove menos- e as aulas pechadas redúcense a dúas -unha menos-. Os centros con máis contagxos contan con catro casos.
Na de Santiago hai 73 casos activos -tres menos- e dúas aulas pechadas -unha menos-, ademais dun centro clausurado ao completo, a escola infantil Santa Susana, que se pechou tras confirmarse o positivo dunha traballadora de apoio, no que hai tres contagios.
MENOS CASOS
As áreas con menos casos son as de Ourense (36), Lugo (36) e Ferrol (13). No caso da primeira aumentan en sete os positivos e mantense unha aula clausurada pola Covid.
Polo seu lado, a de Lugo tamén concentra 36 casos, que supoñen sete máis que a última xornada, e conta cunha aula pechada. E a de Ferrol rexistra 13 positivos --dous máis-- distribuídos en oito centros e dúas clases inoperativas.
