Por E.P. | MADRID | 19/05/2021 | Actualizada ás 19:44
Galicia ofreceuse a colaborar no acollemento dos menores e adolescentes que se atopan en Ceuta ante a crise que se produciu nas últimas horas coa entrada masiva de migrantes á cidade autónoma.
Así llo trasladou o director xeral de Familia, Infancia e Dinamización Demográfica, Jacobo Rey, ao Ministerio de Dereitos Sociais e Axenda 2030, que dirixe Ione Belarra, na reunión convocada de urxencia este mércores por este departamento, a primeira de coordinación coas comunidades en plena crise na fronteira africana.
A Comunidade galega, segundo datos facilitados pola Consellería de Política Social conta actualmente con 147 menores non acompañados institucionalizados. Ademais, acordou en xaneiro recibir outros 15 cidadáns procedentes de Canarias, pero non chegaron a viaxar a Galicia.
Na reunión deste mércores, o Ministerio de Dereitos Sociais propuxo ás comunidades que acollan "nos próximos días" a uns 200 menores que migraron sós a Ceuta, pero non precisou como sería a chegada a cada un dos territorios, aínda que adiantou, segundo as fontes da reunión, que haberá unha partida de 4 millóns de euros que se destinarán para apoiar o labor de acollida.
Segundo informou o ministerio, trátase de menores que xa estaban en centros de protección de Ceuta e cuxa situación legal, escolar e sanitaria está atendida e regularizada pola Cidade Autónoma e, por tanto, serían estes menores os que viaxarían a outros territorios, non os recentemente chegados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.