Por E.P. | Santiago de Compostela | 20/05/2021 | Actualizada ás 16:11
A conselleira do Mar, Rosa Quintana, espera que o Tribunal Superior de Xustiza de Galicia (TSXG) dea a razón á Xunta ante o recurso contencioso administrativo que presentou o Ministerio de Transición Ecolóxica contra a orde de decembro do ano pasado pola que se aprobou o plan xeral de explotación marisqueira para o trienio 2021-2023.
En declaracións aos medios de comunicación, e antes de reunirse pola tarde co sector para trasladarlle a situación, a titular do Goberno galego en materia marítimo pesqueira, Rosa Quintana, cargou contra "unha postura máis da señora Teresa Ribeira (a ministra) que (ao seu xuízo) vén acreditando unha actitude moi belixerante para un sector tan importante para Galicia como o marítimo pesqueiro".
De momento, segundo indicou a conselleira, os mariscadores "están a traballar normalmente" posto que por agora "non houbo decisión de suspensión cautelar da actividade". "E espero que non a haxa, porque, se non, todo o sistema de traballo e de boa xestión que veñen acreditando veríase no aire e sometería a unha indefinición a posibilidade de traballar dunha forma organizada que é como vimos facendo aquí desde o ano 1981", aseverou.
Pola súa banda, fontes de Transición Ecolóxica apuntan que o ministerio "comprende a lóxica preocupación que se puido xerar no colectivo de mariscadores" --que xa anunciou que se presentará como parte afectada-- pero incide en que dita inquietude "non se pode achacar a quen cumpre e pide que se cumpra a normativa vixente, senón á parte que claramente incumpre e ademais persiste niso".
O SECTOR
Pola súa banda, a federación galega de confrarías expresa a súa "sorpresa" ante o que considera "unha nova inxerencia desde Madrid", en concreto do Ministerio de Transición Ecolóxica contra a organización do marisqueo en Galicia.
Ante a convocatoria, por parte de Mar, dos patróns maiores para informarlles sobre o recurso, a federación anuncia que "ante a gravidade do feito" presentarase como parte afectada, ao interpretar que ten "un interese lexítimo no asunto". "Só podemos entender esta cuestión como un ataque frontal á exemplar regularización e xestión do sector profesional do marisqueo en Galicia", afirma nun comunicado de prensa.
Neste sentido, mostra a súa "incredulidade" e culpa ao ministerio de non estar a favorecer o desenvolvemento social e económico na comunidade galega, "desatendendo peticións lexítimas como a modificación da lei de costas e agora pondo en dúbida a exemplar xestión dos recursos marisqueiros en Galicia".
REACCIÓNS DO BNG
O BNG cualifica de "inxerencia" nas competencias da Xunta o recurso contencioso administrativo que presentou o Ministerio de Transición Ecolóxica contra o plan de marisqueo da Xunta, polo que reclama a súa retirada. A deputada nacionalista Rosana Pérez advirte de que o recurso vai contra todo "un país pesqueiro" e atribúeo a unha loita "política e partidista".
Respecto diso, anuncia que o Bloque presentará "de inmediato" iniciativas no Parlamento galego e no Congreso para solicitar a retirada do recurso. E é que, para Rosana Pérez, este recurso pode supor un "dano incalculable" para o sector, á vez que subliña que as competencias autonómicas na materia deben estar "blindadas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.