Feijóo apela aos médicos de Atención Primaria a evitar "discusións de condicións laborais"

O presidente da Xunta, Alberto Núñez Feijóo, apelou aos médicos de Atención Primaria a evitar "discusións de condicións laborais" no contexto de pandemia actual e aposta por abrir "as portas dos centros de saúde".

Así se manifestou preguntado na rolda de prensa posterior ao Consello da Xunta polas demandas de máis medios por parte de médicos de Atención Primaria para afrontar a sobrecarga nos centros de saúde. "O importante é que os pacientes non se merecen ningún tipo de discusión", afirmou o mandatario autonómico, que matizou que os usuarios "levan moitísimo tempo facendo o que se lles pide, pedindo cita telefónica, moitas citas de forma telefónica e non indo a citas presenciais", comentou.

O titular da Xunta comentou que "é evidente que hai algúns colectivos de Atención Primaria que están desconformes" co Sergas, pero afirmou que "moitos médicos de Primaria non se manifestan respecto diso". Para Feijóo os pacientes "merecen" que fagan "abstraccións dalgunhas discusións de condicións laborais" e abran "as portas dos centros de saúde".

CALENDARIO

Con todo, a "intensidade de apertura, o calendario da mesma e a porcentaxe de presenza física do paciente no centro de saúde", apostilou, é o que teñen "que concretar". "Pero non creo que os pacientes merezan antes de finalizar unha pandemia unha discusión que afecte á súa relación co seu médico de familia", sentenciou.

Médicos de familia demandan desde hai tempo ao Sergas, e volveron insistir esta semana, medios humanos e materiais para afrontar a "sobrecarga" nos centros de saúde. Ademais, reiteraron a súa disposición a atender presencialmente todo o que se necesario na medida das posibilidades. Con todo, insisten en reclamar un "novo sistema de xestión da demanda" para acabar coa "sobrecarga brutal".

O presidente da Xunta, Alberto Núñez Feijóo, durante a rolda de prensa posterior ao Consello da Xunta.. DAVID CABEZÓN/XUNTA / Europa Press