Por E.P. | VIGO | 21/05/2021 | Actualizada ás 13:39
A Xunta de Galicia ve o plan estratéxico 'España 2050', presentado nas últimas horas polo presidente do Goberno, Pedro Sánchez, como un "movemento estético", e subliñou que o tecido produtivo está a esperar medidas "a curto prazo".
Así o trasladou o vicepresidente e conselleiro de Economía, Emprego e Innovación, Francisco Conde, en resposta a preguntas dos medios antes de participar na presentación da feira Midtech 2021 en Vigo.
Conde afirmou que a presentación de Sánchez foi "sorprendente desde o punto de vista da perspectiva temporal" porque España ten "neste momento" unha situación de "enorme dificultade a curto prazo". "Falar da España de 2050 cando hai problemas que o Goberno non está a saber resolver en 2021, nin tampouco no contexto de 2030, parece máis un movemento estético de que de contido ou impacto no tecido produtivo", dixo.
A ese respecto, incidiu en que os cidadáns e as empresas "están a esperar decisións a curto prazo", que poñan ao país na senda da transición dixital no contexto da axenda 2030. Por iso, concluíu que a presentación deste informe é "máis unha estratexia de desvío da atención que de contido e impacto real".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.