Concentración de delegados da CIG ante a sede da CEC rexeitando a proposta patronal para o convenio do metal
A Confederación de Empresarios da Coruña (CEC) ofrecera unha "suba salarial do 0,5% para 2020 e do 1% para 2021 e sen garantía de negociar outras melloras sociais e laborais" din desde o sindicato.
Por E.P. | A CORUÑA | 21/05/2021 | Actualizada ás 18:29
Delegados e delegadas da CIG no sector do metal concentráronse ante a sede da Confederación de Empresarios da Coruña (CEC) para mostrar o seu rexeitamento á proposta da patronal para o convenio provincial, "que non responde as demandas trasladadas pola representación sindical", sosteñen desde a central sindical.
A protesta realizouse ao terminar a asemblea de delegados e delegadas de CIG-Industria, que se celebrou na plataforma do edificio sindical da Coruña, para abordar a situación da negociación e valorar os pasos a seguir.
Eduardo Caamaño, portavoz da CIG na mesa de negociación, explica que esta se constituíu a finais de 2019, aínda que a pandemia deixou en suspenso as reunións durante todo o pasado ano.
Ante este parón, as tres centrais sindicais remitiron en abril á patronal unha proposta pechada para un acordo parcial sobre as táboas de 2020 cunha subida salarial do 1% "e o compromiso de seguir negociando o articulado do texto durante este ano".
"Con todo, a patronal respondeu cunha contraoferta de subida salarial do 0,5% para 2020 e do 1% para 2021 e sen garantía de negociar outras melloras sociais e laborais". "Esta proposta non nos vale porque a plataforma unitaria que lle remitimos é pechada co obxectivo de negociar este ano o novo convenio provincial no que se deben incluír melloras laborais, sociais e salariais", sinala.
