A nova tarifa eléctrica incrementa a diferenza de prezos entre os períodos horarios a partir do 1 de xuño
Esta factura introduce como novidade a diferenciación de acceso entre peaxes e cargos.
Por E.P. | Santiago de Compostela | 23/05/2021 | Actualizada ás 13:29
A nova factura eléctrica, que introduce como novidade a diferenciación da tarifa de acceso entre peaxes e cargos, entra en vigor o 1 de xuño, data a partir da cal se incrementa a diferenza de prezos entre os períodos horarios.
As peaxes son prezos regulados destinados a recuperar os custos das redes de transporte e distribución. Mentres, os cargos son os que cobren o resto de custos regulados: financiamento de enerxías renovables, sobrecusto de produción de enerxía en territorios non peninsulares e as anualidades do déficit.
A partir do día 1, todos os consumidores pasarán a ter prezos diferenciados por tramos horarios tanto para a potencia como para o consumo de enerxía e aumentará a diferenza de prezos entre os períodos horarios, tanto en potencia como en enerxía.
No caso dos consumidores domésticos, os novos cargos e peaxes que van entrar en vigor a partir do 1 de xuño de 2021 contemplan unha única tarifa (2.0 TD) para baixa tensión e potencia igual ou inferior a 15 kW.
Todas as subministracións con potencia contratada inferior a 15kW terán unha tarifa con tres termos de enerxía e dous termos de potencia.
Só poderán acollerse ao Prezo Voluntario ao Pequeno Consumidor (PVPC) os consumidores con potencia de contrato menor ou igual a 10 kW, obrigándose aos consumidores con potencia superior a 10 kW a acudir ao mercado libre.
