Falece a científica María Teresa Miras Portugal, que será enterrada no Carballiño este sábado
Miras Portugal, catedrática emérita de Bioquímica e Bioloxía Molecular da Universidade Complutense de Madrid (UCM), e presidenta de honra da Real Academia Nacional de Farmacia
Por E.P. | SANTIAGO DE COMPOSTELA | 27/05/2021 | Actualizada ás 20:15
A científica María Teresa Miras Portugal faleceu este xoves aos 73 anos de idade en Madrid, aínda que por desexo expreso será enterrada no Carballiño, localidade da que era orixinal, segundo informan fontes familiares.
Miras Portugal, catedrática emérita de Bioquímica e Bioloxía Molecular da Universidade Complutense de Madrid (UCM), e presidenta de honra da Real Academia Nacional de Farmacia, tiña 350 obras recoñecidas de nivel internacional e recibiu multitude de premios, como a María Josefa Wonenburger en 2008 e a Medalla Castelao en 2016.
As áreas de investigación nas que se centraba estaban fundamentalmente dirixidas ás neurociencias: funcionamento sináptico, neurotransmisión mediada por nucleótidos e interacción de neurotransmisores, segundo recolle a web da Real Academia Nacional de Farmacia.
Casada e con dous fillos, María Teresa Miras Portugal será enterrada este sábado pola tarde no Carballiño.
