A Autoridade Portuaria da Coruña recibe as primeiras solicitudes de escalas de cruceiros
Os buques reducirán a súa capacidade ao 75%.
Por E.P. | A CORUÑA | 30/05/2021 | Actualizada ás 20:29
A Autoridade Portuaria da Coruña informou de que xa recibiu as primeiras solicitudes de escalas de cruceiros na cidade, tras a publicación este sábado no Boletín Oficial do Estado da resolución do Ministerio de Transportes que autoriza a continuación dos transatlánticos internacionais nos portos españois.
As primeiras solicitudes de escalas son para os meses de xullo e agosto, aínda que non se descarta que nos próximos días se confirme tamén a chegada dalgún buque para o mes de xuño. As navieiras e os operadores do sector viñan traballando nos últimos meses para preparar o regreso da actividade, adaptándose ás normativas e protocolos que esixen as autoridades sanitarias. En España, o Ministerio de Sanidade elaborou un manual coas medidas que deben seguirse tanto durante as viaxes como nas visitas ás cidades nas que recalen os cruceiros, a fin de evitar contaxios de covid-19.
Entre as medidas figuran a obrigatoriedade de realizar probas a todos os pasaxeiros e tripulantes antes de embarcar, así como novos controis durante a travesía. Tamén se aplicarán normas de distanciamento social e a creación de grupos pechados de pasaxeiros, incluíndo as excursións en terra. Ademais, os buques reducirán a súa capacidade ao 75%.
Para preparar a aplicación dos protocolos e recibir os cruceiristas coas maiores garantías de seguridade, a Autoridade Portuaria da Coruña constituirá a comisión de coordinación que se recolle no manual de Sanidade, que se reunirá nos próximos días. A Autoridade Portuaria continuará, así mesmo, os seus contactos coas navieiras e todos os axentes do sector, co obxectivo de potenciar a posición de liderado da Coruña no noroeste de España e confirmar as perspectivas para 2022.
