A covid volve golpear os cárceres de Galicia con 5 contaxios en Pereiro de Aguiar

Volve a covid aos cárceres galegos. Os centros penitenciarios da comunidade, que nos últimos meses veñen de recibir críticas de distintas plataformas pola súa xestión da situación pandémica, volven rexistrar casos activos de coronavirus logo de notificarse o contaxio de cinco internos que pertencerían ao penal de Pereiro de Aguiar, na provincia de Ourense.

A información, adiantada pola CRTVG, cifra en cinco os reclusos contaxiados por covid-19; todos eles, segundo indica o ente público, reos en réxime de terceiro grao e que, en consecuencia, tan só se desprazan ao centro a pasar a noite. Catro destes reclusos estarían a pasar a corentena nos seus domicilios, mentres que o contaxiado restante tería sido ingresado nun centro hospitalario.

Segundo a CRTVG, polo momento hai outras 13 persoas pendentes do resultado das probas diagnósticas, co cal o gromo podería aumentar máis alá das cifras inicialmente ofrecidas. Esculca e Abaixo os muros xa denunciaron en ocasións anteriores a xestión dos penais galegos a respecto da crise da covid, máis enfrontada con restricións á mobilidade que con probas, segundo subliñaron.