O Concello da Coruña esixirá unha declaración responsable para facer churrascadas ou sardiñadas en San Xoán
O 23 de xuño pecharase o acceso ás praias a partir das 21.00 horas.
Por Europa Press / Redacción | A Coruña | 03/06/2021 | Actualizada ás 19:32
O Concello da Coruña publicará este venres un bandomunicipal para regular as actividades permitidas durante a festividade de San Xoán, segundo avanza o goberno local.
No bando, a alcaldesa, Inés Rey, sinala que "aínda persiste a necesidade de limitar as actividades que representan máis risco de contaxio da Covid-19" polo que aposta por un San Xoán que se celebrará nos barrios de maneira similar ao ano pasado, "unha festa familiar nas rúas co fin de evitar as aglomeracións", apuntan desde o consistorio.
O texto lembra que o Concello pechará o día 23 de xuño o acceso ás praias da cidade, que deberán baleirarse de persoas ás 21,00 horas. Non se poderán facer fogueiras en ningún espazo público da cidade, nin poderá haber música ao vivo, nin se autorizará o peche de vías públicas, todo iso para evitar que se produzan reunións dun número excesivo de persoas.
En canto ás sardiñadas, churrascadas ou similares, o día 23 de xuño permitiranse realizar en espazos de titularidade pública, aínda que será necesario que as persoas interesadas presenten unha declaración responsable por escrito ao Concello, manifestando cumprir os requisitos para desenvolver a actividade e identificando a dúas persoas maiores de idade con todos os seus datos de identidade e contacto.
