Aprecian un incremento importante no número de peregrinos facendo o Camiño
As expectativas, segundo indica Alfonso Rueda, son dun incremento fundamentalmente do turismo "de proximidade".
Por Europa Press / Redacción | SANTIAGO DE COMPOSTELA | 05/06/2021 | Actualizada ás 13:28
A Xunta aprecia un incremento no número de peregrinos que realizan o Camiño de Santiago durante as últimas semanas, unha tendencia que confían en que se manteña nos próximos meses apoiado sobre o turismo "de proximidade".
Así o indicou o vicepresidente primeiro da Xunta e responsable da área de turismo, Alfonso Rueda, en declaracións aos medios este sábado antes de asistir á conferencia do exbaloncestista e médico Juan Antonio Corbalán no marco do I Congreso Mundial Xacobeo.
Alí, o 'dous' do Executivo autonómico expresou que "está a subir moito" o número de peregrinos que realizan estas semanas as rutas xacobeas.
Ante a apertura de España a viaxeiros internacionais vacinados, a Administración galega puxo o foco no seguro covid-19 articulado pola Xunta, que estará "operativo" para que os visitantes acudan a Galicia con "unha seguridade engadida".
Neste sentido, Rueda apuntou que as expectativas da Xunta son un incremento do turismo en Galicia, fundamentalmente do de "proximidade", que concentrará o groso das visitas durante os próximos meses.
