Protesta ante a Consellería de Educación para reclamar que non volva "a pandemia dos recortes" docentes
A CIG fala de 1.350 contratacións en perigo de ser extinguidas.
Por E.P. | Santiago de Compostela | 09/06/2021 | Actualizada ás 14:40
Os sindicatos de profesorado seguen instando á Xunta que manteña o esforzo en recursos humanos nos centros de cara ao próximo curso. Este martes, decenas de persoas secundaron unha protesta convocada pola CIG-Ensino para reclamar á Consellería de Cultura, Educación e Ordenación Universitaria que non dea marcha atrás e que prorrogue o reforzo de docentes polo menos para o próximo período académico.
O sindicato, que se concentrou ante a sede de Educación en Santiago de Compostela, advertiu que a redución da distancia de seguridade en ESO e Bacharelato, que pasaría de 1,5 a 1,2 metros entre alumnos, provocaría unha "redución drástica" de grupos, un incremento do cociente alumno profesor e un retorno á "pandemia dos recortes".
Así o advertiu este mércores o secretario nacional de CIG-Ensino, Suso Bermello, que denunciou que esta situación podería afectar a unhas 1.350 contratacións realizadas este ano pola Xunta para atender os desdobres de aulas realizadas nos centros educativos e cumprir cos protocolos Covid.
Unha hipotética marcha atrás implicaría, engade Bermello, unha "perda de calidade educativa" ademais de postos de traballo, dado que a pesar do uso obrigatorio de máscara e das diferentes medidas de seguridade sanitaria, todos os profesionais coinciden en que "nunca se deronunhas condicións como as deste curso", ao pasar de contar con aulas de 32 ou 33 alumnos a outras de entre 18 a 21.
Esta redución do cociente supuxo unha redución "exponencial da conflitividade" nos centros e do "número de expedientes", ademais dunha mellora notable dos resultados académicos do alumnado.
Bermello insistiu que esta realidade constatou que "a demanda histórica" de redución de cocientes realizada pola comunidade educativa é "o principal elemento para dotar ao ensino público dun alto nivel de calidade".
Por todo iso, entre outros factores, o portavoz de CIG-Ensino demandou a Educación que manteña as contratacións realizadas durante a pandemia e que se consoliden como prazas estruturais, de modo que así se incorporen aos claustros "a tempo completo para poder atender mellor" o alumnado e a diversidade.
"Levamos dous cursos absolutamente anormais e o que necesita tanto o alumnado como o profesorado, no curso que entra, é que non se reduzan os postos de traballo e que non se reduza o cociente. Esa é a cuestión fundamental", resolveu.
