Por E.P. | SANTIAGO DE COMPOSTELA | 09/06/2021 | Actualizada ás 15:12
O Parlamento galego instou á Xunta a dirixirse ao Goberno central para que adopte "as medidas necesarias" dirixidas a reducir "o impacto negativo" da nova tarifa eléctrica na economía das familias e na competitividade das empresas.
Fíxoo a través dunha iniciativa do PP aprobada no pleno da Cámara autonómica na xornada do mércores. O martes, o hemiciclo acolleu o debate de dous textos sobre este asunto, un dos populares e outro do Bloque.
Así, a proposta aprobada reclama o impulso, "como mínimo", de medidas como impulsar o descenso da factura eléctrica a través da revisión dos tramos horarios, así como da supresión do gravame do imposto sobre a produción de electricidade.
Tamén demanda traspasar aos orzamentos xerais do estado "algúns dos custos regulados" da tarifa eléctrica, a débeda do sistema eléctrico e os custos extrapeninsulares.
En terceiro lugar, pide revisar a tributación que soporta a factura eléctrica e impulsar unha reforma fiscal que harmonice a fiscalidade que esta factura soporta en España cos gravames medios dos países da contorna. Nesta liña, o Bloque pedía que o IVE da electricidade pasase do 21% ao 4%.
OUTRAS TRES DEMANDAS
Un cuarto punto que solicita o texto aprobado é conceder "máis peso específico ao termo de enerxía que ao de potencia" e un sexto apartado require simplificar a factura eléctrica "para facilitar a súa comprensión, e pór en marcha de inmediato unha campaña de información" aos consumidores.
Por último, propón ampliar o dereito de poder acollerse ao prezo voluntario do pequeno consumidor ata potencias iguais ou inferiores a 15KW para o consumidor doméstico, co fin de facilitar o acceso ao bono social eléctrico.
XACOBEO 2021
O Parlamento de Galicia instou á Xunta a solicitar do Goberno central que o Ministerio de Industria, Comercio e Turismo conte coa participación das comunidades autónomas para o deseño do plan turístico nacional do Xacobeo 21-22.
En concreto, a iniciativa, que defendeu o PP na primeira xornada do pleno da Cámara autonómica, reclama esa participación dentro das competencias das comunidades no ámbito turístico, "para a concreción de accións e para a aplicación de recursos económicos paralos anos 2021-2022".
Ademais, a proposición non de lei aprobada solicita que o ministerio se comprometa a facer a presentación oficial do plan na comunidade galega. No debate, este martes, o deputado popular Borja Verea insistiu en que o Goberno central "non está comprometido" coa celebración do Xacobeo a nivel "institucional e económico".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.