Por Europa Press / Redacción | SANTIAGO DE COMPOSTELA | 10/06/2021 | Actualizada ás 14:59
A Xunta destina anualmente 49 millóns de euros para confinanciar prazas en residencias de maiores privadas a través de concertos, así como outros 25 millóns de euros para o 'Bono Autonomía', que se concede a persoas que teñen recoñecido o dereito a unha praza nun centro residencial público pero que non poden acceder a ela por falta de dispoñibilidade.
Estas cifras foron repasadas polo director xeral de Maiores e Persoas con Discapacidade, Fernando González Abeijón, en resposta a unha pregunta formulada pola deputada do BNG Olalla Rodil, que acusou á Xunta, durante o transcurso da Comisión 5ª do Parlamento de Galicia, de "drenar" fondos públicos a través dos concertos ás empresas privadas, que xestionan "oito de cada dez prazas" residenciais en Galicia.
González Abeijón resaltou o incremento "dun 44%" das prazas públicas que, di, pasaron de 5.500 en 2009 ás 8.000 da actualidade. En todo caso, tras defender a necesidade da convivencia entre o sistema privado e o público, recoñeceu que 49 millóns de euros anuais das arcas públicas van parar a financiar concertos de prazas en residencias privadas.
A eles súmanse os 25 millóns de euros anuais do coñecido como 'Bono Autonomía', que cobre a estancia nun centro privado dun usuario ao que se recoñeceron unha praza nunha residencia pública pero que, por falta de dispoñibilidade no sistema, non pode acceder a ela.
A continuación, o responsable autonómico sinalou que o prezo medio da praza concertada aumentou por "dous factores". Por unha banda, o aumento do IPC e, por outro, a "homologación progresiva" do prezo medio a nivel galego coas tarifas do resto do Estado.
Ademais, tras ser instado a aclarar canto custa unha praza nunha residencia pública pola deputada nacionalista, González Abeijón afirmou que "non está establecido" a canto ascende o "gasto directo" por unha praza pública posto que "múltiples casuísticas" fan "moi difícil" facer un cálculo efectivo dese prezo diario.
DEPENDENCIA
Doutra banda, tamén na Comisión 5ª celebrada este xoves, o director xeral de Atención Sociosanitaria, Antón Acevedo, apuntou que os bonos de atención á dependencia aumentaron ata os 28,7 millóns polos 6,8 que había en 2008, ano respecto ao cal "se multiplicou por seis" o número de persoas atendidas (de 2.400 a 14.800).
Acevedo fixo gala destas cifras durante a súa intervención na comisión para responder a unha pregunta da deputada socialista Paloma Castro sobre os atrasos no pago de axudas á dependencia rexistrados a comezos do ano, que o responsable autonómico atribuíu aos cambios organizativos na Consellería de Política Social coa creación da Dirección Xeral que el mesmo asumiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.