Sanidade anuncia avances no plan de reforma da Atención Primaria

O consello técnico de Atención Primaria celebrou este xoves unha nova reunión co obxectivo de avanzar na reforma deste nivel asistencial. Nun comunicado, a Consellería de Sanidade lembrou que este órgano foi creado a partir do documento do Plan Galego de Atención Primaria 2019-2021, con carácter permanente e co obxectivo de realizar asesoramento en aspectos científicos, sociais e profesionais no ámbito da Atención Primaria.

Deste xeito, ten como función a avaliación das necesidades de recursos humanos no primeiro nivel asistencial e a análise da súa capacidade resolutiva, das carteiras de servizos e das oportunidades de mellora na xestión de procesos asistenciais e nas relacións entre primaria e hospitalaria.

Así, no encontro deste xoves, conforme apuntou a consellería, concretáronse as conclusións das comisións sectoriais expostas na anterior reunión e presentáronse os resultados de traballo das comisións correspondentes a "Coordinación atención primaria- atención hospitalaria" e "Prescrición eficiente de medicamentos e probas diagnósticas ", respectivamente.

Ademais, o grupo compartiu opinións en relación ao recente documento sobre as axendas dos médicos de familia, que se está facendo público polos directores de Atención Primaria das diferentes áreas sanitarias, e que está a ser aplicado en diferentes centros de saúde.

A reunión estivo presidida polo xerente do Sergas, José Flores Arias, e contou coa presenza dos directores xerais de Asistencia Sanitaria, Jorge Aboal; de Recursos Económicos, María Jesús Piñeiro Belo; de Recursos Humanos, Ana Comesaña Álvarez; así como a directora xeral de Planificación e Reforma Sanitaria da Conselleríade Sanidade, Estrela López-Pardo.

Reunión do consello técnico de Atención Primaria da Xunta. XUNTA | Fonte: Europa Press