Os composteláns piden deixar vender a Manolo, o das castañas, "e revisen o que haxa que revisar"
Indignados co Concello de Santiago, que prohibiu a Manolo Prieto exercer o traballo que levaba 53 anos exercendo, poñen en marcha unha petición.
Por Galicia Confidencial | Compostela | 12/06/2021 | Actualizada ás 10:00
O obxectivo está fixado en 2.500 persoas e por agora levan 1709 firmas. Moitos composteláns, a través dunha petición en Change.org, piden ao Concello que "revise o que teña que revisar" pero que deixe a Manolo Prieto exercer o traballo que levaba 53 anos exercendo na Porta Faxeira: vender castañas asadas no outono e xeados no verán.
Segundo explican na petición, o Concello de Santiago non se contentou con "permitir instalar ao seu redor tres xeaderías en locais comerciais" senón que ademais se puxo "a revisar a normativa de vendedores ambulantes" e lle prohibiu situar o seu carriño no emprazamento que mantiña aos seus 67 anos.
Indican tamén que a veciñanza se atopa indignada con esta situación e piden ao Concello que lles devolva "a icona" que lles roubou.
