Ana Pontón avisa a Pedro Sánchez que o BNG será "intransixente" defendendo os compromisos con Galicia
A portavoz nacional do BNG fixo estas afirmacións nunha visita a Pontevedra onde reclamou á Xunta que se implique na recuperación do convento de Santa Clara.
Por Europa Press / Redacción | SANTIAGO DE COMPOSTELA | 15/06/2021 | Actualizada ás 16:58
A portavoz nacional do BNG, Ana Pontón, anunciou que reclamará no Parlamento galego a implicación da Xunta na recuperación e rehabilitación do Convento de Santa Clara, que acaba de ser incorporado ao patrimonio municipal do Concello de Pontevedra.
No transcurso dunha visita á cidade do Lérez, acompañada do alcalde, Miguel Anxo Fernández Lores, a líder nacionalista dixo que "a Xunta non pode porse de perfil na posta en valor deste patrimonio", senón que debe implicarse economicamente "con prazos e recursos concretos" para pór este espazo emblemático a disposición da cidadanía.
Pontón tamén sinalou que esta non é a única actuación na que o Goberno de Alberto Núñez Feijóo debe implicarse con Pontevedra "fronte ao inmobilismo" coa cidade que practica coas súas "promesas longamente incumpridas".
Entre elas mencionou a variante de Alba "que segue paralizada"; a construción dunha nova residencia, "que non avanza pese a que os terreos xa foron cedidos"; así como o saneamento da ría e do río Lérez e actuacións de acougado do tráfico en vías de competencia autonómica.
"INCUMPRIMENTOS" DO GOBERNO CENTRAL
A portavoz nacional do BNG tamén se referiu a os "incumprimentos" do Goberno do Estado, como a execución do nó de bombeiros, a autovía A-57 e as actuacións no Paseo de Marín.
A este respecto, a dirixente nacionalista advertiu a Pedro Sánchez, que o Bloque será "intransixente" á hora de defender o cumprimento dos compromisos pendentes con Galicia e que figuraban no acordo de investidura.
Neste contexto, Pontón acusou ao Partido Popular e ao Partido Socialista de tratar aos galegos "como cidadáns de segunda" e apuntou que "a única maneira de cambiar ese guión das forzas estatais é que teñamos cada vez máis forza para poder presionar a favor de Galicia e contra ao centralismo madrileño que nós discrimina".
LORES, "MÁIS FORTE QUE NUNCA"
Así mesmo, a portavoz nacional do BNG, Ana Pontón, expresou o seu "orgullo" polo feito de que, desde 1999, o BNG desenvolve no Concello de Pontevedra "políticas transformadoras que a converteron nun referente internacional".
Segundo Pontón, a xestión levada a cabo polo alcalde desde entón demostrou ter "visión de futuro" con "propostas de vangarda que se adiantaron en décadas a temas que hoxe están na axenda", como son, segundo enumerou, o coidado do medio ambiente, a redución de emisións contaminantes, a mobilidade sustentable e a recuperación do espazo público para as persoas.
Neste sentido, preguntada pola posibilidade de que Miguel Anxo Fernández Lores repita como candidato do BNG nas próximas eleccións municipais, Pontón citou as declaracións do rexedor nesta comparecencia, indicando que o mellor é ir "partido a partido", tendo en conta que se está no ecuador do mandato municipal.
En todo caso, a líder do Bloque indicou que ve a Lores "máis forte que nunca, acompañado dun equipo de dez, capaces de seguir reinventando Pontevedra". Respondendo as preguntas dos xornalistas, tanto Pontón como Lores indicaron que sexa cal for o resultado do recurso xudicial interposto contra a prórroga da concesión dos terreos que ocupa a fábrica de Ence en Lourizán, o BNG non vai renunciar a que a pasteira se traslade e permita recuperación integral da Ría. "Porque así o queren a maioría dos e das pontevedresas", recalcaron respecto diso.
