As universidades deberán ter un "sistema interno de garantía de calidade" para ser consideradas como tal

O secretario xeral de Universidades, José Manuel Pingarrón, avanzou este xoves na Comisión de Ciencia, Innovación e Universidades do Congreso, máis detalles sobre a futura Lei Orgánica do Sistema Universitario (LOSU), así como os reais decretos que prepara o Ministerio de Universidades que servirán de complemento á Lei.

Segundo explicou, o futuro Real Decreto de creación, recoñecemento, autorización e acreditación de universidades e centros universitarios, que substituirá ao Real Decreto 420/2015, recollerá a obrigación de que as universidades, tanto futuras como actuais, poñan en marcha, no prazo de cinco anos, un "sistema interno de garantía de calidade" para ser consideradas como tal.

"Cando un proxecto universitario se presenta, agora na Memoria débese recoller o compromiso de pór en marcha este sistema e a temporalidade do mesmo, e para unha universidade que actualmente estea establecida, tamén; hai 5 anos como para que ese sistema estea establecido", sinalou Pingarrón, que indica que o obxectivo desta medida é asegurar unha mínima calidade dos títulos.

Doutra banda, o secretario xeral de Universidades lamenta que actualmente non haxa ningún requisito de calidade para os másteres propios, senón que cada universidade os regula como quere. Co novo RD que prepara o Ministerio de Universidades, estes másteres deberán contar cun informe favorable do denominado sistema interno de garantía de calidade de cada institución como medida de "control previo".

Pingarrón expuxo a importancia deste sistema interno cunha anécdota. O secretario xeral di que recibiu unha chamada alertando sobre un máster nunhas universidades sobre "os beneficios do tabaco na saúde" e chamou ao reitor para preguntar sobre o mesmo, contestando este que "non tiña nin idea". "Se os órganos internos da universidade non son capaces de levar un control deste tipo de ensinos, pois ao final pode pasar calquera cousa", avisa.

Do mesmo xeito, Pingarrón lembra que tampouco hai actualmente un requisito de porcentaxe de títulos non acreditados para poder presentar outros. Pero co novo RD, establécense uns mínimos, de forma que se unha universidade tivese un terzo dos títulos oficiais que oferta non acreditados ou retirados, non se lle permitirá a presentación de novos títulos ata que eses problemas se emenden.

Igualmente, Pingarrón subliña que desde o Ministerio comprometéronse a que unha vez se aprobe o RD, do que só falta o trámite de informe do Consello de Estado, "todo o proceso global de verificación dun título novo non poida exceder máis de 6 meses".

Varios estudantes esperan para facer un exame nunha aula da Facultade de Psicoloxía da Universidade de Santiago de Compostela | Fonte: César Arxina - Europa Press.