Caballero tacha a alianza entre PP e Democracia Ourensana de "falta de respecto aos ourensáns"

O secretario xeral do PSdeG-PSOE, Gonzalo Caballero, tachou este xoves a alianza entre Partido Popular e Democracia Ourensana como "unha falta de respecto aos ourensáns".

A pesar de que na comparecencia ante os medios de Gonzalo Caballero aínda non se confirmou o acordo entre ambas as formacións, Caballero sostivo que "os xogos de ligoteos, de agora si, agora non" entre PP e Democracia Ourensana só eran un "sainete para a terceira cidade galega".

"Están a converter isto nunha telenovela por capítulos na que os ourensáns non sacan nada", apuntaba Caballero para considerar que os populres e DO "non pensan na cidade" e "implican unha crise municipal con efectos gravísimos".

"Os socialistas queremos dicirlles que soamente pensar nos seus embigos, con esa deriva de idas e vindas, é unha falta de respecto para os ourensáns que queren un goberno capaz e potente para impulsar a reactivación", criticou o socialista.

Así mesmo, lembrou que foi a súa formación a que gañou as eleccións, hai dous anos, con Rafael Rodríguez Villarino como candidato á Alcaldía de Ourense e insistiu en que a súa formación está "en condición" de "dar" un bo goberno e se non é posible de "ofrecer unha oposición lexítima consistente e capaz".

"Non pode ser que a terceira cidade de Galicia siga nas noticias polo esperpento, polo sainete, pola crise municipal e polos encontros e reencontros nos que Feijóo nunca quere aparecer", sentenciou Caballero.

Nesta mesma liña mostrouse o portavoz do PSOE municipal, Rafael Rodríguez Villarino, quen criticou que o "único" que se estaba discutindo entre PP e Democracia Ourensá eran "os detalles" porque "isto non se fai por Ourense porque non hai un porqué, hai un por canto". "Ese por canto é o que se está negociando para saber como se poden aproveitar de Ourense", acusou Villarino.

Así, Rafael Rodríguez Villarino sinalou que o Partido Popular "negou todo o que fixo" como "que puxesen ningunha condición para integrarse", "ou teñen un problema moi grave de memoria ou teñen unha cara dura".

Ademais, criticou que carecen da estabilidade que ofrecen porque a suma do PP e "do que queda do naufraxio de DO nunca dará estabilidade ao Concello de Ourense". "Hai un goberno que gañou as eleccións, que sería estable e ao que non se lle permite gobernar, aínda que contaría cos apoios suficientes e con conexións no Estado e en calquera outra administración para facer posible que Ourense tivese o goberno que realmente merece", asegurou.

O secretario xeral do PSdeG, Gonzalo Caballero, na rolda de prensa. PSDEG