O BNG pide declarar o litoral "espazo non apto" para proxectos de eólica mariña
Presentará reclamacións ante o Goberno por unha normativa que "obvia" as singularidades de Galicia e "prexudica" ao sector pesqueiro.
Por Europa Press / Redacción | SANTIAGO DE COMPOSTELA | 25/06/2021 | Actualizada ás 13:56
O BNG quere que o litoral galego sexa declarado "espazo non apto" para proxectos de eólica mariña (tamén coñecidos como 'offshore') polo seu impacto no sector pesqueiro e marisqueiro.
Así o destacou a portavoz de Pesca dos nacionalistas no Parlamento galego Rosana Pérez, que tamén avanzou que a formación frontista presentará reclamacións ante o Ministerio para a Transición Ecolóxica e Reto Demográfico polo contido dos Plans de Ordenamento do Espazo Mariño (POEM) que amparan o desenvolvemento de proxectos de parques de eólica mariña.
Para a deputada, estes plans "obvian absolutamente" tanto as competencias, "nalgúns casos exclusivas", da Comunidade galega como as "singularidades" de Galicia e pon "en mans" das "grandes" compañías eléctricas o impulso a unha actividade económica que, segundo o Bloque, prexudicaría os intereses dun sector como o pesqueiro, que é "absolutamente prevalente en materia económica, social e ambiental".
Neste sentido, ademais dos pasos a nivel institucional que prevén dar, o BNG iniciará unha campaña de contacto con representantes do sector "de todo o litoral" galego para coñecer de primeira man as súas inquietudes e estudar a convocatoria de mobilizacións e protestas.
CRÍTICAS A PP E PSOE
Nunha rolda de prensa celebrada este venres no Pazo do Hórreo, a deputada Rosana Pérez censurou a actitude de PP e PSdeG, que apoiaron a aprobación dunha iniciativa parlamentaria para situarse a favor da implantación deste tipo de explotación enerxética en Galicia.
A continuación, sinalou que a suspensión ditada polo Goberno central á tramitación de novos proxectos de eólica mariña este venres ata que exista un novo marco regulatorio para este ámbito dá "a razón" ao Bloque, que continuará coas súas accións para presionar de face a que se limite esta actividade.
En todo caso, a formación frontista quere que Galicia sexa declarada "espazo non apto" para este tipo de proxectos e que, no caso de que se autoricen, dependan sempre da autorización da Xunta.
