Por E.P. | A Coruña | 25/06/2021 | Actualizada ás 14:56
Marea Atlántica defenderá no próximo pleno unha moción na que reclamará a creación da empresa municipal 'Coruña Enerxía', despois do compromiso do PSOE para que isto se leve a cabo, "ofrecendo no sector eléctrico unha alternativa pública que traballe polo interese xeral e non especule cun ben de primeira necesidade".
A portavoz da Marea Atlántica, María García, explicou que "nestes momentos, coa factura da luz batendo marcas, sería o momento de ter un operador eléctrico na Coruña, que non só poida ofrecer prezos sociais, senón que fomente a enerxía limpa e ofreza oportunidades de emprego".
Por iso, a Marea insta a Inés Rey "a cumprir o acordado e a dar os pasos para constituír Coruña Enerxía, como empresa pública comercializadora de enerxía 100% renovable e que ataque os casos de pobreza enerxética".
Tamén reclaman a creación da Oficina Municipal da Enerxía, "para asesorar a veciñanza en medidas de aforro no consumo e de aforro nas facturas", e a elaboración do Mapa das Enerxías Renovables, "para identificar as vías nas que o Concello podería xerar electricidade próxima ao lugar de consumo".
Finalmente, tamén consideran necesario que "o goberno local manteña o compromiso, adquirido en 2018, de que a subministración de enerxía aos edificios municipais proveña de fontes 100% renovables".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.