A Xunta lanza unha plataforma dixital de núcleos rurais en estado de abandono para combater o despoboamento

A Xunta lanzou unha plataforma dixital de núcleos rurais en estado de abandono para combater o despoboamento e reactivar estas zonas da comunidade. Esta ferramenta atópase prevista na Lei de rehabilitación e de rexeneración e renovación urbanas e busca mobilizar núcleos abandonados para atraer poboación, aínda que, polo momento, só ofrece información relativa a inmobles situados en Sober (Lugo), o concello escollido para a experiencia piloto de lanzamento.

Precisamente, a conselleira de Medio Ambiente, Territorio e Vivenda, Ángeles Vázquez, presentou a iniciativa en Sober, onde chamou ás demais entidades locais galegas con núcleos rurais en situación de abandono a sumarse ao uso desta ferramenta dixital para atraer poboación.

Para difundir esta ferramenta entre os seus potenciais beneficiarios, a conselleira asinou un protocolo de colaboración co presidente da Federación Galega de Municipios e Provincias (Fegamp), Alberto Varela; o presidente do Colexio oficial de Administradores de Leiras de Galicia, Martín Bermúdez da Ponte, e o homólogo deste último no Colexio de Axentes da Propiedade Inmobiliaria da Coruña, Herminio Carballido.

Vázquez explicou que os concellos poden participar na plataforma mediante a achega de información sobre zonas e lugares en situación de abandono nos seus termos municipais. Ademais, os particulares poden utilizar a ferramenta para sacar ao mercado as súas propiedades ou para adquirir ou alugar inmobles nunha contorna rural.