Educación defende que as medidas funcionaron nos centros e "as aulas non foron vectores de contaxio"

A Xunta de Galicia valorou o desenvolvemento do último curso escolar 2020-2021 --marcado pola pandemia de covid-19--, "moi preto da normalidade dentro da excepcionalidade". Así o explicou o secretario xeral técnico da Consellería de Educación, Manuel Vila, que compareceu este venres, a petición do Grupo Popular, na comisión que aborda os asuntos de carácter educativo e cultural.

Vila indicou que o curso 2020-2021 "pasará á historia como un dos máis complicados pero tamén polo compromiso demostrado pola sociedade para soportalo". "Todos resistiron para garantir un sistema educativo con igualdade de oportunidades", subliñou o secretario, que destacou que o curso finalizou "con plena presencialidade".

Manuel Vila explicou que a covid-19 obrigou o sector a refacer protocolos e reorganizar o sistema para dotalo dos medios necesarios para facer os centros seguros e evitar que se convertesen en focos de contaxio. Así, indicou que, con datos do 13 de xuño, pode afirmarse que "as aulas non foron vectores de contaxio", posto que do total de membros da comunidade educativa, só se viu afectado o 3%, fronte ao 4% de toda a poboación galega.

"Desde o punto de vista epidemiolóxico, os centros foron parte da solución, e non do problema", recalcou Vila, que indicou ademais que "o éxito do sistema educativo é tamén o éxito do sanitario".

"Todas as medidas foron eficaces e suficientes, a pesar de ser diferentes", sinalou Vila respecto dos protocolos distintos aplicados segundo a idade dos escolares. Para o secretario, a ventilación e a máscara foron "determinantes".

Manuel Vila apuntou ademais o importante papel do Comité Educativo creado polo Executivo autonómico para xestionar a evolución da pandemia nos centros e que desenvolveu protocolos para comedores, actividades extraescolares e absentismo escolar, entre outros aspectos. "O comité, formado por 35 profesionais de diferentes ámbitos, estivo activo todo o curso e monitorou a implantación das medidas", apuntou Vila.

O secretario xeral técnico destacou ademais os 162 millóns de euros destinados a "garantir a seguridade sanitaria e blindar o funcionamento do sistema educativo". Unha partida que se utilizou para dotar de máscaras a profesores e nenos, reforzar a partida de gastos dos colexios e para a 'Reserva de Garantía Educativa', dotada con sete millóns de euros, e co obxectivo de "facer fronte aos gastos derivados da covid-19".

"Tamén se reforzou o profesorado, con 2.300 profesionais contratados para asegurar o 100% da presencialidade, algo que poucas Comunidades Autónomas conseguiron", detallou Vila que, con todo, explicou que se puxo en marcha un plan de atención virtual "para que cada persoa que necesitase material dixital ou conectividade o obtivese en 24 ou 48 horas".

PROTOCOLO 2021-2022

Preguntado polas medidas que levarán a cabo no próximo curso, a partir de setembro de 2021, Vila explicou que existe xa un borrador do protocolo "que pasou xa polo Comité Educativo" e que "espera" sexa validado "proximamente" polo Comité Clínico.

Manuel Vila confirmou que manterán as ordes propias de Sanidade como o mantemento das unidades de convivencia na etapa infantil, o uso de máscaras en maiores de seis anos e o respecto á distancia de seguridade de 1,5 metros --que pode ser dun metro de haber biombo".

Con todo, o secretario destacou que o escenario "variará" en función da vacinación e destacou que terá que ser un protocolo "flexible, de transición". "É imprescindible que o Goberno central comunique a súa postura e diga con que fondos se vai contar", sinalou Vila.