O BNG levará ao próximo pleno na Coruña unha moción contra a nova tarifa eléctrica
Demandará a creación de mecanismos que compensen que Galicia sexa produtora de enerxía.
Por Europa Press / Redacción | A CORUÑA | 28/06/2021 | Actualizada ás 14:50
O BNG defenderá no pleno do próximo 8 de xullo do Concello da Coruña unha moción contra a subida da factura da luz e na que demandará a creación de mecanismos para que Galicia se benefície de ser produtora de enerxía.
Segundo explica o BNG nun comunicado, a reforma que implica este decreto xera un "impacto negativo" nos consumidores e consumidoras, especialmente naquelas persoas adheridas xa con anterioridade ao sistema de discriminación horaria.
"En Galicia hai máis de medio millón de fogares adheridos a esta modalidade que verán como a súa factura experimenta un aumento que pode chegar a superar o 30%", apuntou o portavoz nacionalista en María Pita, Francisco Jorquera.
A formación nacionalista espera o apoio do pleno para instar o Goberno a que rectifique e abra un novo proceso de regulación da tarifa eléctrica máis xusto social e territorialmente.
O BNG sinala que desde o punto de vista territorial fai falta "beneficiar aqueles territorios que, como Galicia, son produtores de enerxía, compensando o forte impacto ambiental e social que sofren cun abaratamento dos prezos".
