Ence nega ser causa de contaminación na ría e culpa á "incapacidade" das depuradoras municipais

Ence Pontevedra saíu este martes ao paso das acusacións de Ecoloxistas en Acción (organización que outorgou á planta de Lourizán unha 'bandeira negra' por ser foco de "contaminación"), e aclarou que os problemas na ría non teñen a súa orixe en verteduras da pasteira, cuxa calidade ambiental defendeu.

A empresa asegurou nun comunicado que a súa planta "cumpre con todos os parámetros ambientais" establecidos na súa Autorización Ambiental Integrada e é "un referente en Europa" desde o punto de vista ambiental. A ese respecto, detallou que non utiliza no seu proceso produtivo mercurio, á vez que "o proceso de branqueo é totalmente libre de cloro, sendo unha das poucas plantas de celulosa de Europa que non utiliza blanqueantes haloxenados".

Con respecto aos niveis de contaminación da ría de Pontevedra, Ence apuntou que, aínda que as augas están afectadas por presenza de coliformes e bacterias contaminantes, esta circunstancia está vinculada "unicamente á incapacidade das depuradoras municipais para tratar o gran volume de auga que lles chega". "Esta eventual contaminación nada ten que ver coa actividade da planta de Ence", recalcaron fontes da compañía.

Así, a empresa engadiu que "as augas e o marisco da ría de Pontevedra non ven en absoluto prexudicadas pola presenza e a actividade da planta de Ence" e que, por contra, están en "niveis análogos" aos da maioria de rías, como revelan os datos que manexa o Intecmar.

CONCESIÓN

Ence referiuse á concesión de biofábrica en Lourizán, que foi prorrogada en 2016 por un prazo de 50 anos, máis outros 10 adicionais vinculados a un compromiso de investimento en melloras ambientais e operativas. Esa ampliación, sinalou ENCE, fíxose "en cumprimento estrito da legalidade".

A empresa atópase agora á espera de que se pronuncie a Audiencia Nacional sobre os recursos presentados contra esa prórroga e salientou que "enxeñarías independentes" certificaron que a planta "non podería trasladarse a ningún outro emprazamento, nin por criterios técnicos nin económicos".

CALIDADE AMBIENTAL

A empresa subliñou que AENOR "certificou un ano máis a calidade ambiental da biofábrica", que cumpre a certificación ISO 14.001 de sistemas de xestión ambiental. "Nesta auditoría ratificouse que o principal indicador da calidade do afluente -a Demanda Química de Osíxeno (DQO)-, mellora nun 87% o rango superior de referencia que marca a normativa europea de mellores prácticas ambientais do sector da celulosa para este parámetro".

Segundo concluíu, a planta de Pontevedra é "unha das máis transparentes medioambientalmente de España" e, xa hai dúas décadas, foi pioneira en adherirse "de forma voluntaria" ao Sistema Comunitario de Ecoxestión e Auditoría Ambiental (EMAS), que establece como requisito o reporte público do desempeño ambiental da planta na súa Declaración Ambiental anual.

Finalmente, puxo en valor a súa "xestión forestal sustentable", que "contribúe á loita contra os incendios e favorece a vertebración do territorio".