Por E.P. | SANTIAGO DE COMPOSTELA | 01/07/2021 | Actualizada ás 13:42
A Deputación de Pontevedra constituíu unha Comisión Interdepartamental co obxectivo de "elaborar de maneira participativa" e con "visión estratéxica" unha Axenda Urbana e Rural propia para converter á provincia de Pontevedra nun espazo "máis sustentable, resiliente, inclusivo e seguro".
A presidenta da Deputación de Pontevedra, Carmela Silva presidiu este xoves xunto ao vicepresidente provincial, César Mosquera, a reunión de constitución desta comisión que traballará para tender redes con institucións, sectores estratéxicos e o tecido social.
Este equipo estará integrado por persoal dos servizos de Infraestruturas (que coordina a comisión), Mobilidade, Turismo, Medio Ambiente, Cooperación e do Plan Revitaliza.
Con esta inciativa, a Deputación de Pontevedra segue o camiño que xa iniciaron outras institucións provinciais como Barcelona ou Granada para, como primeiro paso, realizar un diagnóstico da situación da provincia e, a partir de aí, elaborar un documento estratéxico que contemple os principios, obxectivos, criterios e pautas de actuación "para o desenvolvemento sustentable e integrador da provincia".
A Axenda da provincia identificará as "áreas funcionais" do territorio que, en moitos casos, coincidirán coas comarcas. Isto "permitirá ser máis eficaces á hora de implantar accións ou programas" e, ademais, determinará as actuacións que levarán a cabo para establecer prioridades e ordenalas en función da súa tipoloxía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.