Sanidade alerta do "incremento importante" da incidencia por COVID entre a mocidade
A Consellería de Sanidade revisará todas as medidas de seguridade fronte ao virus.
- Lixeiro retroceso nos contaxios mentres que os activos en Galicia superan os 2.000 e as UCI rexistran 11 pacientes
- Morre un home de 61 anos con covid e sen patoloxías previas en Lugo
- Máis do 50% dos galegos está inmunizado contra a COVID e o 67% ten polo menos unha dose
Por Europa Press / Redacción | Santiago de Compostela | 03/07/2021 | Actualizada ás 15:29
O conselleiro de Sanidade, Julio García Comesaña, alertou de "incremento importante" da incidencia acumulada da covid-19 unicamente entre as franxas de idade máis jovenes, un "escenario diferente" que lle permite avanzar que "probablemente" o comité clínico do próximo martes teña que "revisar" as súas medidas.
Así o aseverou nunha rolda de prensa ofrecida este sábado desde a sede da Consellería en Santiago, na que vinculou a subida dos contaxios e dos casos activos nos últimos días ao 'macrobrote' con orixe nas viaxes de fin de curso a Mallorca, que deixa xa 183 positivos e máis de 400 contactos estreitos cuarentenados en Galicia.
En concreto, as incidencias acumuladas por 100.000 habitantes a 14 días elévanse especialmente nas franxas de idade máis baixas, cun valor de 219,9 entre persoas de 12 a 19 anos; de 188,3 de 20 a 29 anos; e de 106,06 positivos por 100.000 habitantes entre 30 a 39 anos. Mentres tanto, entre os 40 e os 49 anos a taxa xa baixa a 73,1 e de 50 a 59 anos está en 31,78.
Neste contexto, García Comesaña dirixiuse á mocidade, tras pedirlles "desculpas por non poder vacinalos" ao non dispor de doses suficientes, para solicitarlles "un esforzo máis" por cumprir as medidas xa establecidas para conter o coronavirus, como manter a distancia, usar máscara, lavarse frecuentemente as mans e evitar as aglomeracións. Non en balde, lembrou que os botellóns están "prohibidos".
SEGUIMENTO POR CONCELLOS
Pola súa banda, a directora xeral de Saúde Pública, Carmen Durán Parrondo, aproveitou a comparecencia para debullar aqueles territorios están "en seguimento epidemiolóxico" porque teñen as incidencias máis altas da Comunidade galega.
Neste sentido, mencionou "toda a comarca de Pontevedra", onde a cidade do Lérez ten unha incidencia acumulada de 86 positivos por cada 100.000 habitantes a 14 días, e a cidade de Ourense, cunha taxa de 84 contagios por 100.000 habitantes a 14 días.
O Sergas tamén ampliou a Vilagarcía de Arousa este seguimento especial, xa que a súa incidencia disparouse a 133 despois de que nos últimos días detectase 50 casos. Xunto a isto, a directora xeral de Saúde Pública lembrou a sitación de Carnota e Sarria, os únicos municipios en nivel alto de restricións, o que obriga á súa vixilancia.
En calquera caso, Durán Parrondo insistiu en que o comité clínico avaliará non soamente este dato, senón un total de 14 variables, para establecer as medidas que corresponda.
UNHA SITUACIÓN "DIFERENTE"
Na mesma liña, o conselleiro apelou a "esperar a que se celebre" esa reunión, porque aínda que a situación epidemiolóxica "empeora" con respecto a hai semanas, é "diferente" en función da idade debido ao avance da vacinación.
Ademais, a presión hospitalaria é "boa", tal e como a definiu García Comesaña, polo que considera que o que hai que facer é "adaptar" as restricións a esta realidade. "Todas as medidas que fomos tomando no comité clínico desde o principio tiñan o fin último de preservar a capacidade asistencial dos nosos hospitais", agregou.
