Feijóo reclama recuperar a "cogobernanza" para "acertar" na repartición dos fondos europeos
Rueda quéixase da "discriminación" nos fondos do plan de turismo sustentable e avisa de que Galicia "non o vai a permitir".
Por Europa Press / Redacción | SANTIAGO DE COMPOSTELA | 05/07/2021 | Actualizada ás 16:55
O presidente da Xunta, Alberto Núñez Feijóo, volveu a reivindicar nesta xornada a oportunidade que para a reactivación económica supoñen os fondos europeos Next Generation, á vez que insistiu na mensaxe que lanza desde hai semanas: é imprescindible" recuperar a "cogobernanza" e blindar "a obxectividade e a concorrencia competitiva" para "acertar" na súa repartición.
Durante a súa participación na mesa de debate xunto aos presidentes de Estremadura, Murcia, Canarias, Castela e León, Comunidade Valenciana e Baleares, no marco do I xornada Next Generation de 'elEconomista', Feijóo esgrimiu que o Goberno central non pode esquecer que estes fondos son para devolver.
"E se os gastamos de forma inadecuada teremos dous problemas: perderemos unha oportunidade; e teremos unha débeda e moitas dificultades para devolver o prestado", argumentou, antes de incidir na importancia de acertar apostando por proxectos sólidos e a longo prazo, que melloren a competitividade da economía e que xeren emprego", sentenciou.
"De momento non hai concorrencia, nin obxectividade, nin cogobernanza e descoñecemos cales son os criterios de repartición, cando é necesario que existan para que as comunidades podamos competir en función dos proxectos presentados", incidiu, á vez que lembrou que o 68% da candidatura galega, que aspira a captar preto de 20.000 millóns de euros, está formada por investimento privado.
Nesta liña, e a modo de exemplo, Feijóo lamentou a decisión do Ministerio de Industria de xestionar de forma centralizada os máis de 12.000 millóns de euros que ata agora lle corresponden a este departamento do Goberno central a través dos Next Generation.
Así mesmo, remarcou que dos fondos que ata agora distribuíu o Goberno central --covid, REACT-UE, para sectores afectados pola pandemia e fondos territorializados vinculados aos Next Generation-- Galicia recibiu "828 millóns menos" dos que lle corresponderían de acordo co sistema de financiamento autonómico, un feito que cuestionou dado que o 50% do gasto público de España xestiónano as comunidades, ademais de ter as competencias de sanidade, educación e servizos sociais.
CATALUÑA
Por outra banda, sobre comisións bilaterais con Cataluña, o presidente remarcou que "España non se pode reunir consigo mesma" e lembrou que os presidentes autonómicos son primeira autoridade do Estado no seu territorio en ausencia do xefe do Executivo central.
"Cataluña ten un problema de gobernabilidade que exportou ao resto de España", lamentou Feijóo, antes de pór o foco en que, á súa vez, a gobernabilidade de España "depende do que queira en boa parte Cataluña". "Isto distorsiona, tensiona e produce un freo para o desenvolvemento económico e social de España", resumiu.
QUEIXAS DA XUNTA POLO PLAN DE TURISMO SUSTENTABLE
Tamén no marco da repartición de fondos, o vicepresidente primeiro da Xunta, Alfonso Rueda, insistiu na "discriminación" a Galicia no marco dos recursos do plan sustentable de turismo. "Agora dinnos que Galicia recibirá uns 25 millóns menos e que se trata de favorecer máis a comunidades con máis prexuízos no turismo", lembrou.
Neste punto, o vicepresidente galego defendeu que se os empresarios ligados a este sector puideron "aguantar mellor" é "porque se deron axudas directas" desde a Administración autonómica e censurou que o paso do Goberno central "non ten lóxica" e é "un exemplo máis de discriminación".
"Xa dixo Sánchez que ía facer o que lle dese a gana e aquí un exemplo máis que tentaremos corrixir", engadiu, antes de reivindicar que para Galicia este é "un ano fundamental" (no marco do Xacobeo bianual) e que, igual que non quere "sacar a ninguén" recursos, a Xunta tampouco consentirá que se lle retiren á Comunidade.
