O empresariado internacional busca matemáticos en Galicia para dar solución aos grandes retos da industria

Pero, e as matemáticas para que serven? Unha pregunta que sen dúbida resoa a miúdo nas cabezas de moitos estudantes cando os presentan por primeira vez á trigonometría, as ecuacións de segundo grao, e demais técnicas. Pois para resolver moitos dos problemas do tecido económico. Cando menos así o consideran dende a industria internacional, que do 12 ao 16 de xullo ten cita en Santiago de Compostela cos mellores matemáticos de Galicia.

O encontro terá lugar no marco do “163  ESGI  European  Study  Group  with  Industry”, un evento internacional no que diversos expertos matemáticos ofrecerán solucións a problemas actuais expostos por industrias de moi distinta clase. O obxectivo do encontro, apuntan dende a organización, pasa por dar a coñecer o “potencial” da tecnoloxía matemática, que, á parte de resultar útil, é barata. 

O encontro, que “seguramente” terá lugar en liña por mor das circunstancias sanitarias, conta con múltiples investigadores matemáticos organizados en grupos de traballo nos que tratan de abordar e resolver distintos problemas propostos polas industrias que se sumaron á cita. “Aí é onde reside o seu éxito -sinala María Dolores Gómez, representante do comité científico e organizador deste evento, investigadora adscrita a  ITMATI e profesora titular da Universidade de Santiago-. Destaca que, “debido á natureza transversal das matemáticas, estes problemas son abordables en todos os sectores económicos e empresariais”.

UTILIDADE PARA AS EMPRESAS

O principal obxectivo do encontro pasa por dar a coñecer as “capacidades” das matemáticas e a súa “aplicabilidade nunha gran parte dos retos e necesidades do tecido industrial”. Todo coa fin de achegar a pequenas, medianas e grandes empresas unha tecnoloxía cun gran potencial, con investigadores moi cualificados e que “non necesita de grandes investimentos para o seu uso”, en palabras de manifesta Gómez. 

No transcurso deste evento trataranse de atopar solucións aos problemas industriais existentes, establecer relacións de traballo duradeiras e produtivas entre os matemáticos de investigación máis aplicada e a industria, así como expor novas liñas de investigación baseadas en retos empresariais. Ademais, tal como indica a investigadora de  ITMATI, “trátase de afianzar a importancia das matemáticas na industria e a presenza dos perfís matemáticos nas compañías, estimulando unha maior conciencia na sociedade do poder das matemáticas na prestación de vías de solución aos problemas do mundo real”.