O PP aproba en solitario a lei para a creación da universidade privada de Abanca

O PPdeG aprobou en solitario o proxecto de lei de recoñecemento da Universidade Intercontinental da Empresa, impulsada por Abanca a través de Afundación, entre críticas da oposición, conformada polos grupos parlamentarios do BNG e o PSdeG, pola "duplicidade" das titulacións que ofertará.

Nun pleno celebrado este martes no Pazo do Hórreo, a creación da universidade privada superou o último trámite lexislativo coa aprobación do texto normativo que permitirá o desenvolvemento e a implantación dun modelo que se prevé que se poña en marcha no curso 2022-2023. Con todo, rexeitáronse as emendas do BNG e o PSdeG.

Durante o debate, o deputado do PPdeG Ovidio Rodeiro reivindicou a "aposta firme" da Xunta pola universidade pública mostrada mediante unha conxelación das taxas desde hai 11 anos e o "incremento" das transferencias. Mentres, descartou que se vaia "privatizar" o sistema dada a recente autorización para a implantación de 12 titulacións nas institucións educativas públicas e achacou as críticas da oposición á creación dunha universidade privada "un intento de xustificar os seus argumentos cargados de compoñente ideolóxico" fronte a "un proxecto solvente".

Así, reprobou que pidan "máis informes e controis" á universidade promovida por Abanca dos que se requiren a outras de carácter privado noutras comunidades. Tamén asegurou que non duplicará a oferta existente dado que acollerá titulacións que estaban adscritas á Universidade de Vigo (UVigo).

Mentres, o portavoz de Educación do BNG, Manuel Lourenzo, recriminou a creación dunha universidade que, ao seu xuízo, "non responde o interese xeral, senón o de Abanca" e criticou que non se aceptasen as emendas presentadas pola súa formación, que buscaban que se destinasen o 35% dos ingresos a bolsas e o 25% a investigación.

Ademais, Lourenzo lamentou que a Secretaría Xeral de Universidades "actuase cal correa de transmisión dos intereses da Fundación Abanca" e, tras tachar de "fraudulenta" a tramitación da lei, recalcou que este "chiringuito" duplica titulacións existentes no sistema universitario galego con prezos que superan os 11.000 euros de media anuais por título.

A deputada socialista Noa Díaz tamén puxo o foco na "duplicidade" de titulacións que suporá a nova universidade e en que as instalacións que utilizará Afundación para acollela "proveñen do patrimonio social das caixas galegas", polo que descartou que non supoña un custo para os galegos. Adicionalmente, Díaz reprobou que non se admitisen as emendas nas que o seu grupo pedía aumentar os ingresos de Abanca destinados a bolsas universitarias e instou á Xunta a "aumentar" o financiamento estrutural das institucións educativas públicas e as bolsas, así como a promover contratos que permitan rexuvenecer o seu persoal.

Tras o debate, o deputado socialista Pablo Arangüena pediu a palabra para denunciar a "manipulación" da votación, xa que, segundo sinalou, o presidente do Parlamento, Miguel Ángel Santalices "esperou ata que estivo presente a maioría (do PPdeG) para aprobar a lei". A este respecto, Santalices asegurou que "non actuou con maldade" e achacou as afirmacións de Arangüena a unha "interpretación".

"COMPROMISO" DA UNIVERSIDADE

Pola súa banda, Afundación remarcou que a Universidade Intercontinental da Empresa (UIE) que promove nace co "compromiso" de representar unha institución educativa "de calidade e innovadora" para "beneficio" de Galicia e co obxectivo de entrar en funcionamento no curso 2022-2023.

Neste sentido, o presidente de Afundación e a Fundación Universidade Intercontinental da Empresa, Miguel Ángel Escotet, valorou a "confianza" outorgada pola Cámara galega a un proxecto que "vén sumar e diversificar a educación universitaria e postuniversitaria en Galicia". Ademais, subliñou que representa "unha entidade sen ánimo de lucro, de servizo público e xestión privada" cuxos "esforzos" se centrarán "nos estudantes e na sociedade galega", de acordo coa lema do seu escudo, 'cognitio, innovatio, ductus' (coñecemento, innovación, liderado).