Cofides presenta a empresas da Cámara da Coruña afectadas pola covid un fondo de recapitalización

O director xeral de Cofides, Rodrigo Madrazo, acompañado polo presidente da Cámara, Antonio Couceiro, presentou a empresas da Cámara da Coruña afectadas pola covid-19 un fondo de recapitalización para fomentar a recuperación económica mediante o reforzo da solvencia corporativa.

O director xeral de Cofides presentou as características do Fondo de Recapitalización, que permitirá ás empresas de tamaño medio que se viron afectadas pola pandemia acceder ao financiamento necesario para recuperar a normalidade no seu negocio, nun encontro celebrado na sede da Cámara da Coruña.

Rodrigo Madrazo afirmou que "o obxectivo deste fondo é apoiar a solvencia de empresas que estean a atravesar dificultades, pero que sexan viables, para que poidan progresar no futuro e contribuír así á súa recuperación".

Madrazo explicou que este fondo "se dirixe ás empresas medianas, un segmento empresarial que resulta clave dentro da estrutura produtiva española pola súa capacidade de innovación, pola súa inserción nas cadeas de valor e a creación de emprego".

Pola súa banda, o presidente da Cámara da Coruña, Antonio Couceiro, eloxiou "os esforzos que a entidade cameral está a facer desde que comezou a pandemia e a crise económica derivada da mesma para que as empresas e os emprendedores poidan facer fronte a unha situación da que sairemos, con esforzo, en primeiro lugar, e tamén coa necesaria axuda que nos brindan as distintas administracións".

FONDO DE RECAPITALIZACIÓN

O fondo, dotado con 1.000 millóns de euros de orixe pública, ten como obxectivo evitar a destrución de emprego e do tecido produtivo a nivel estatal e autonómico.

As empresas que sexan seleccionadas poderán acceder a un financiamento entre os 3 e os 25 millóns de euros (entre 3 millóns e 15 millóns para pemes; e entre 4 e 25 millóns non pemes), que se materializarán a través de investimentos de carácter temporal en forma de participacións no capital social, préstamos participativos e outros instrumentos financeiros.

En canto á duración media do financiamento, esta roldará os oito anos, aínda que o espírito do fondo busca unha rápida amortización dos investimentos (ao redor de cinco anos) e cada caso será analizado de maneira individual.

Desde o 30 de xuño, as compañías de tamaño mediano que atravesan dificultades de carácter temporal a consecuencia da pandemia, pero que son viables no medio e longo prazo, poden presentar as súas solicitudes na plataforma que Cofides habilitou para a presentación de documentación de maneira telemática.

As empresas interesadas poden solicitar financiamento a través do correo electrónico fondorecapitalizacion@cofides.es.