O PP acusa a PSOE e BNG de "usar" a Deputación de Pontevedra como "sede política" para confrontar coa Xunta
Critican os "actos de propaganda" do organismo provincial.
Por E.P. | SANTIAGO DE COMPOSTELA | 14/07/2021 | Actualizada ás 17:03
O grupo provincial do PP acusou ao PSOE e ao BNG de usar a Deputación de Pontevedra como "sede política" para confrontar co Goberno galego e facer "seguidismo" do presidente do Goberno central, Pedro Sánchez.
Nunha rolda de prensa celebrada este mércores na sede provincial do PP, os portavoces populares, Jorge Cubela e Pepa Pardo, acusaron á presidenta da Deputación de Pontevedra, Carmela Silva de manter a "confrontación política permanente" co Executivo que preside Alberto Núñez Feijóo.
O grupo provincial do Partido Popular reclamou a PSOE e BNG que "abandonen a propaganda e o oportunismo político" e aposten por "converter á Deputación de Pontevedra nunha institución útil para os pontevedreses, para os concellos, os colectivos e os sectores estratéxicos".
Jorge Cubela fixo balance da xestión do Goberno provincial cando se cumpren dous anos de mandato durante os cales "os pequenos e medianos municipios da provincia continúan perdendo peso e importancia". Tamén reprocharon a "falta de diálogo" desta administración e que a pandemia sanitaria "evidenciou as carencias" dun Goberno "que estivo totalmente desaparecido na xestión" e que "non está tampouco á altura para reactivar a provincia". Para o Partido Popular, "a Deputación é incapaz de liderar a recuperación económica".
"GRAN ACTO DE PROPAGANDA"
Cubela tamén criticou o "amplo dispositivo" que o Goberno organizou diante do Pazo provincial para facer balance do seu seis anos á fronte da Deputación de Pontevedra. "Un gran acto de propaganda, cun gran envoltorio e moi pouco contido", segundo o portavoz do PP que reprochou que a Deputación "continúa ao servizo exclusivo da imaxe da presidenta".
