Por Europa Press / Redacción | MADRID | 19/07/2021 | Actualizada ás 15:58
A Federación de Organismos de Radio e Televisión Autonómicos (FORTA) e Radiotelevisión Española (RTVE) rubricaron este luns o 'Convenio Compostela', un acordo "histórico e inédito" entre as dúas entidades.
Así o indicaron ambas as entidades nun comunicado conxunto, no que explicaron que o obxectivo deste convenio é "compartir coñecemento e maximizar os rendementos dos diferentes sistemas públicos de comunicación de cara ao futuro".
A presidenta da FORTA, Mar Iglesias, e o presidente de RTVE, José Manuel Pérez Tornero, asinaron un convenio de colaboración, denominado 'Convenio Compostela', pois a 'Cidade da Cultura' da capital de Galicia foi o espazo elixido para selar a alianza, que tamén contou coa presenza do secretario xeral de FORTA, Enrique Laucirica, e o director xeral de CRTVG, Alfonso Sánchez Izquierdo.
Segundo informaron FORTA e RTVE, ambas as organizacións "buscan reforzar o posicionamento dos servizos audiovisuais públicos, no ámbito nacional, europeo e internacional, nun mercado cada vez máis global".
Así, as dúas organizacións comprométense á colaboración no desenvolvemento de proxectos de produción audiovisual, en calquera formato, e na adquisición de contidos audiovisuais de interese común.
A procura constante da innovación por parte dos medios públicos é outra das partes máis relevantes deste acordo e prevese tamén o desenvolvemento de estratexias en materia de tanto de innovación como de formación, segundo detallaron.
O acordo tamén contempla a posta en marcha de proxectos dixitais colaborativos "coa aspiración de que os medios públicos sexan cada vez máis referentes para o conxunto do sector e dar así un mellor servizo á cidadanía".
Doutra banda, o documento asume tamén a procura dun marco de financiamento e fiscalidade estable e eficaz, e o desenvolvemento de estratexias e políticas de gobernación e comunicación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.