Por Europa Press / Redacción | SANTIAGO DE COMPOSTELA | 21/07/2021 | Actualizada ás 16:14
As forzas e corpos de seguridade do Estado centrarán en espazos e concentracións públicas os controis para velar polo cumprimento das medidas sanitarias en Galicia co fin de frear a Covid-19.
Así o informou a Delegación do Goberno nun comunicado, no que indica que a subdelegada na provincia da Coruña, María Rivas, presidiu este mércores unha reunión con responsables provinciais das forzas e corpos de seguridade do Estado o cumprimento das medidas relacionadas coa Covid-19.
Na reunión estiveron presentes mandos da Policía Nacional, Policía Nacional Adscrita, Garda Civil e policías locais de Ferrol, Santiago e A Coruña. Tras a entrada en vigor das últimas medidas, as forzas e corpos de seguridade do Estado "manteñen a vixilancia das restricións impostas pola Xunta como ata agora", asegurou.
A transferencia de información entre os diferentes corpos, segundo constatou a subdelegada do Goberno, "continúa con bo funcionamento, o que permite garantir un amplo nivel de cumprimento", indicou.
Na reunión acordouse "seguir priorizando a actuación policial nos espazos e concentracións públicas como posibles elementos para a propagación da enfermidade, especialmente nos sectores da poboación non vacinados". "Imos manter a intensidade dos dispositivos de control", afirmou María Rivas.
A Delegación do Goberno explica que, da mesma maneira, actuarase tamén "con especial atención" no relativo ao cumprimento das medidas que afectan o lecer nocturno.
A subdelegada do Goberno reiterou o seu agradecemento aos integrantes das forzas e corpos de seguridade por "o seu labor e esforzo continuado" para tratar de garantir o cumprimento das normas sanitarias.
RESPONSABILIDADE
Así mesmo, a subdelegada do Goberno comentou que "os datos de contaxio obrigan a apelar de novo á responsabilidade individual e colectiva".
Deste xeito, chamou a "respectar as normas sanitarias" para frear a Covid-19. "Pedimos unha vez máis moita prudencia e moita responsabilidade", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.