Investigado un condutor de 70 anos por circular en sentido contrario pola A-75 en Verín
Foi proposto para unha revisión extraordinaria pola posible perda de condicións psicofísicas que lle impidan conducir.
Por Europa Press / Redacción | SANTIAGO DE COMPOSTELA | 23/07/2021 | Actualizada ás 12:30
Unha patrulla do Destacamento de Tráfico da Garda Civil de Verín, xunto con outra do Posto de Seguridade Cidadá da Benemérita do mesmo municipio, interceptaron un condutor septuaxenario que circulaba en sentido contrario pola A-75. Segundo informou o Instituto Armado, na mañá deste mércores foi interceptado na autovía A-75, á altura do quilómetro 2, no termo municipal de Verín, un vehículo que circulaba cara a Verín polos carrís reservados ao sentido Portugal.
Sobre as 10,30 horas, a central operativa COTA avisou da circulación dun vehículo que circulaba en sentido contrario pola zona de Verín. Así, activado o protocolo establecido para o efecto, os gardas civís interceptaron preto da saída de Verín ao condutor, un home de 70 anos domiciliado en Baltar.
O septuaxenario, indicaron as mesmas fontes, manifestou "non acordarse do lugar concreto no que accedera á autovía", polo que, engaden, "non se pode determinar o espazo que percorreu". Ademais, como o resultado da proba de alcoholemia foi negativo, propúxoselle para unha revisión extraordinaria pola posible perda de condicións psicofísicas que lle impidan conducir.
"RÁPIDA ACTUACIÓN"
"A escaseza de circulación a esas horas e a rápida actuación dos gardas civís lograron eliminar as nefastas consecuencias que a perigosa conduta puido orixinar", asegura a Benemérita. O condutor pódese enfrontar, lembra a Garda Civil, a penas de prisión dun a dous anos, multa de seis a doce meses e privación do dereito a conducir vehículos a motor e ciclomotores de seis a dez anos.
