Formuladas 28 denuncias por circular pola rúa sen ser convivente de madrugada na fin de semana en Sanxenxo

A Policía Local interpuxo este pasado fin de semana 28 denuncias por transitar pola vía pública a persoas non conviventes no tramo horario comprendido entre a 1,00 e as 6,00 horas, por estar prohibido pola normativa sanitaria vixente para frear a Covid-19.

Así o informou o Concello de Sanxenxo, que lembra que se trata dunha limitación que entrou en vigor o pasado sábado, xornada na que pasou este municipio ao nivel de máximas restricións, polo que ten limitada a agrupación de persoas non convivientes durante a madrugada.

A realización de botellón en distintos puntos do municipio saldouse con 19 denuncias e con posibles sancións que poden alcanzar os 1.000 euros, resaltaron as mesmas fontes.

Beber na rúa "está dobremente prohibido", lembran as mesmas fontes municipais, tanto pola Lei de Saúde aprobada pola Xunta de Galicia como por ordenanza municipal. Ademais, as festas privadas en piso orixinaron seis denuncias.

"Os comportamentos incívicos tamén obtiveron resposta por parte da Policía Local que tramitou tres denuncias por ouriñar na vía pública e oito por desordes na vía pública (berros na rúa)", destaca as mesmas fontes.

Así mesmo, as máscaras supuxeron seis denuncias no balance da fin de semana ao non estar garantida a distancia social en ningún dos casos.

"BO COMPORTAMENTO"

O Concello destacou "o bo comportamento" dos locais hostaleiros en canto ao peche e desenvolvemento da súa actividade "con tan só unha denuncia por ocupación excesiva da vía pública coa terraza", apostila.

Na actualidade o aforamento na hostalaría é do 50% en terrazas e o 30% no interior. Ademais, lembra o Concello que o consumo dentro dos locais deberá ir xustificado co certificado de vacinación completado ou unha proba negativa de Covid.

Mozos pasean por unha zona de locais de lecer nocturno en Sanxenxo.. Marta Vázquez Rodríguez - Europa Press | Fonte: Europa Press