Por E.P. | SANTIAGO DE COMPOSTELA | 26/07/2021 | Actualizada ás 18:06
O vicepresidente primeiro da Xunta, Alfonso Rueda, ratificou este luns, na liña do que xa avanzara a semana pasada, que Galicia espera recibir esta semana, a última de xullo, o peregrino número 50.000 de 2021. Farao, tras unha semana, a do Apóstolo, na que se entregaron un total de 7.064 compostelas na capital galega. Nunha intervención ante os medios, previa a participar na reunión do Comité Internacional de Expertos do Camiño, Rueda revelou tamén que só entre o venres e o domingo o total de peregrinos que recolleron a súa acreditación de realizar a ruta xacobea foi duns 5.500.
Non en balde, a Xunta sitúa o Camiño de Santiago como o principal elemento de atracción de visitantes a Galicia, que antes da irrupción da pandemia marcaba cifras récord na chegada de peregrinos. En concreto, en 2019, alcanzou a súa cifra marca de expedición de compostelas: 347.578, un 28% máis que no último Xacobeo de 2010. Rueda remarcou que, nun contexto marcado pola pandemia do coronavirus, estes bos datos están "a recuperarse". O exemplo está no dato da última semana --coas 7.064 compostelas entregadas fronte ás 1.292 de entre xaneiro e abril--.
E neste contexto, antes de participar na reunión do Comité Internacional, do que destacou o seu "papel fundamental" no asesoramento ao Goberno galego e no intercambio de coñecementos científicos e culturais para potenciar aínda máis o Camiño de Santiago, incidiu na necesidade de "planificar as cousas para non morrer de éxito".
MESES DE TRABALLO
Rueda subliñou que a Xunta leva "moitos meses traballando para ter todo listo e acoller nas mellores condicións" os peregrinos, preparando e adecuando o Camiño ás novas circunstancias, adaptando os albergues, mellorando as rutas e pondo en marcha o seguro coronavirus para "poder ter o mellor Xacobeo posible".
"A xente ten necesidade de viaxar, de respirar aire puro en espazos abertos e de deixar atrás os malos intres da pandemia. Pero ten que facelo sabendo que o seu destino é seguro, para eles e para os seus. E Galicia é ese destino seguro, agora máis que nunca", dixo Rueda, aínda consciente de que o virus "está en todas partes", como evidencian os casos de contagios xa rexistrados no Camiño.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.