Aumentan os positivos en covid-19 no buque militar 'Cantabria', con base en Ferrol
Dous novos casos confirmados súmanse aos sete detectados a pasada fin de semana nas probas realizadas en Cádiz.
Por Europa Press / Redacción | Ferrol | 28/07/2021 | Actualizada ás 14:53
As probas PCR realizadas á dotación do buque de aprovisionamento 'Cantabria', con base en Ferrol, á súa chegada ao arsenal militar revelaron dous novos positivos en Covid-19 e outros tres "sospeitosos" ao observarse nas resultados "trazas" de coronavirus.
Fixéronse 150 tests entre toda a dotación que chegou nas últimas horas a Ferrol, xa sen os sete membros da tripulación que deron positivo no control realizado en Cádiz, onde o buque, do mesmo xeito que a fragata 'Almirante Juan de Borbón', estivera nas últimas semanas completando a súa cualificación operativa.
Os dous positivos e os tres sospeitosos permanecen illados nos seus domicilios, segundo informa a Armada. A estes últimos someteráselles a unha nova PCR no día de mañá e ao resto da dotación prescribíuselle "confinamento responsable" nas súas vivendas ata que se lles repita a proba, transcorridos dez días.
Estes novos casos súmanse aos detectados entre a tripulación da fragata 'Almirante Juan de Borbón'. Seis membros foron illados en Cádiz a fin de semana e outros sete á súa chegada a Ferrol, onde se someteu a toda a dotación (177 persoas) a unha nova proba.
