O orzamento de 2022 será similar ao deste ano en Galicia, 11.571 millóns, 8 millóns máis que en 2021

Feijoo volve a presumir "de rapidez" na presentación das súas contas. O BNG censura que o teito de gasto "decrece" ao descontar a devolución do IVE, "coma se non existise a pandemia".

Por Europa Press / Redacción | SANTIAGO DE COMPOSTELA | 29/07/2021 | Actualizada ás 14:22

Comparte esta noticia

O orzamento de Galicia para o ano 2022 será similar ao que está vixente, tendo en conta que, segundo revelou o presidente autonómico, Alberto Núñez Feijóo, o teito de gasto que ratificará a semana próxima o Parlamento ascende a 11.571 millóns de euros, o que supón un lixeiro incremento de 8 millóns en relación ao anterior.

Así o ratificou na rolda de prensa posterior ao Consello da Xunta, na que tamén comparece o conselleiro de Facenda, Valeriano Martínez, a cuxo equipo agradeceu o seu pronto labor o xefe do Executivo autonómico, tendo en conta que ata a reunión do Consello de Política Fiscal e Financeira (CPFF) da pasada xornada non se coñecían cifras concretas para deseñar o escenario macroeconómico.

"Máis rápido non se pode facer", destacou Feijóo, quen advertiu que Galicia, nun contexto aínda marcado pola pandemia da covid-19, volverá ter unhas contas que crezan, aínda que sexa lixeiramente con respecto ás deste 2021, porque o Goberno se comprometeu a devolver os 211 millóns de IVE que debe á Comunidade. "De non ser pola sentenza do IVE, teriamos que baixar o teito de gasto por ese importe", manifestou o presidente galego.

Feijóo e Valeriano Martínez no Consello da Xunta.. DAVID CABEZÓN @ XUNTA DE GALICIA
Feijóo e Valeriano Martínez no Consello da Xunta.. DAVID CABEZÓN @ XUNTA DE GALICIA | Fonte: Europa Press

"De non ser pola sentenza (do Tribunal Supremo) do IVE, teriamos que baixar o teito de gasto por ese importe", manifestou o presidente galego, quen incidiu, en todo caso e na liña co manifestado por Martínez posteriormente, en que este orzamento segue sendo "excepcional" polas partidas que incorpora coa crise da covid-19 como transfondo.

E é que, aínda que para o próximo 2022 o incremento será leve, para 2021 as contas galegas experimentaran unha subida que roldaba o 15%. Previamente, tras os anos marcados pola crise económica, Galicia volvera a recuperar o cinco díxitos e superar os 10.000 millóns de orzamento nas contas de 2020.

CADRO MACROECONÓMICO

No que respecta ao cadro macroeconómico, o Goberno galego prevé que Galicia recuperará a mediados de 2022 o nivel de riqueza pre covid, en palabras de Feijóo, "antes que o conxunto de España".

Actualizou as súas previsións para este exercicio en vigor --rebaixando o crecemento económico ao 5,5% e situando a taxa de paro no 12,7%--, mentres que para 2022 expón que o PIB galego terá un crecemento do 6% e a taxa de paro situarase no 12,1%.

Coas previsións deste ano e do próximo, Galicia, destaca o Executivo autonómico, encadeará dous exercicios de crecemento sostido da economía e do emprego.

REBAIXA FISCAL

Preguntado sobre o compromiso de Feijóo de profundar nas rebaixas fiscais, o conselleiro mostrouse prudente e precisou que abordar este tipo de cuestións tocará máis adiante, cando se conforme o conxunto dos orzamentos autonómicos, aínda que considera que hai que cumprir coas "palabras dadas".

Recentemente, no congreso do PPdeG, o presidente galego volveu insistir neste compromiso e chanceou con que tiña "case convencido" a Valeriano Martínez para ratificar novas rebaixas fiscais.

Aprobado polo Consello este teito de gasto, será remitido á Cámara para a súa autorización, co obxectivo de aprobar o proxecto definitivo das contas autonómicas antes do 20 de outubro, segundo recolle a normativa autonómica. Aínda que a data para o pleno extraordinario está formalmente pendente pechar, na súa intervención o presidente galego deu por feito que será o martes que vén.

BNG

A portavoz parlamentaria de Economía do BNG, Noa Presas, realizou unha avaliación "negativa" do teito de gasto para as contas de 2022, aprobado este xoves polo Consello da Xunta, porque eses 11.571 millóns de euros supoñen que o orzamento para 2022 "decrece", se se descontan os 211 millóns de euros da devolución do IVE por parte do Goberno central.

"Vai a menos coma se a pandemia non existise", reprobou Presas, para quen "o mellor teito de gasto é o que non existe", coa finalidade de "non pór límites" ao gasto en sanidade pública e os sectores que sufriron o maior impacto da crise.

Na súa opinión, "parece a antesala de que o Goberno prepara uns orzamentos rutineiros, que non apostan por un cambio de modelo nin no económico nin no social".

Fronte a iso, asegura que o BNG levará ao pleno da próxima semana para debater o teito de gasto propostas para que as contas públicas SE CENTREN en "reforzar os servizos públicos, camiñar cara a un novo modelo de residencias e reactivar os sectores produtivos para saír da crise".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta