Galicia, o "destino preferido" para veranear en albergues, con máis de 40.000 viaxeiros só en xuño
Os viaxeiros en aloxamentos extrahoteleiros triplícanse con respecto ao verán pasado.
Por E.P. | SANTIAGO DE COMPOSTELA | 30/07/2021 | Actualizada ás 11:36
Galicia rexistrou un total de 96.969 viaxeiros que realizaron 212.094 pernoctacións en aloxamentos extrahoteleiros --apartamento turísticos, cámpings, casas rurais e albergues-- no mes de xuño, o que supón tres veces máis das cifras rexistradas no mesmo mes de 2020, segundo datos publicados este venres polo Instituto Nacional de Estatística (INE). De tal forma, as 212.094 pernoctacións triplícanse respecto das 80.963 dun ano antes; mentres que os viaxeiros son case catro veces máis, ao pasar en 12 meses de 25.542 a 96.969.
Mención especial merecen os albergues en Galicia, dado que pasan de non ter rexistros en xuño de 2020 por estar na súa maioría pechados a supor gran parte da demanda de xuño de 2021: 40.059 viaxeiros e 48.534 pernoctacións.
De feito, o INE destaca que Galicia "é o destino preferido" no uso de albergues, nun contexto de ano Xacobeo. Os máis de 40.000 viaxeiros nestes establecementos en Galicia supoñen un terzo do total de toda España en xuño. Dos 40.059 viaxeiros que se aloxaron en albergues, 27.035 son residentes en España e 13.024 son estranxeiros. A estancia media é de pouco máis dun día. Hai 159 albergues abertos en Galicia con 8.500 prazas estimadas, onde se emprega a 683 traballadores.
Polo demais, cámpings (32.399 viaxeiros e 102.689 pernoctaciones), apartamentos turísticos (12.895 viaxeiros e 41.040 pernoctaciones) e casas rurais (11.616 viaxeiros e 19.831 pernoctaciones) duplican a súa ocupación na comparativa interanual.
