Un novo positivo eleva a 22 os contaxios en residencias galegas
Foi detectado nun centro da Zapateira, na Coruña. Os centros de discapacidade, pola súa banda, suman 24 casos.
Por E.P. | SANTIAGO DE COMPOSTELA | 31/07/2021 | Actualizada ás 14:28
As residencias de maiores de Galicia rexistran 22 casos de Covid-19, ao contar un novo na Residencia de maiores Caser A Zapateira, na Coruña; mentres que os casos en residencias de discapacidade mantéñense en 24 positivos.
Segundo informaron este sábado as consellerías de Política Social e Sanidade, dos 22 casos en residencias de maiores, un pertence a Caser A Zapateira, 18 á Residencia Santo Estebo de Perlio (Fene), dúas ao centro Bo Día Magnolio (Vigo) e un á residencia de Val do Dubra.
CENTROS DE DISCAPACIDADE
En canto aos centros de atención á discapacidade suman 24 casos, dos que 21 son usuarios do Fogar e Clínica San Rafael de Vigo; seguen dous na RGA Valverde de Allariz (Ourense) e un no CAPD de Sarria (Lugo).
