Marea Atlántica e Goberno da Coruña manteñen as discrepancias sobre o futuro do Porto

A portavoz de Marea Atlántica, María García, discrepa co goberno local da Coruña sobre o futuro do Porto. Para a Marea non se pode facer "un importantísimo esforzo económico sen que se mova o marco establecido en 2004", sobre todo na parte inmobiliaria.

"Eses convenios ameazan o desenvolvemento dos peiraos e supoñen unha carga que é o desenvolvemento inmobiliario no bordo litoral, se hai un esforzo que sexa para sacar esa ameaza de enriba da mesa", manifestou García.

O concelleiro de urbanismo, Juan Díaz Villoslada, dixo que os convenios manteñen a súa vixencia no Plan Xeral, pero abriu a porta para "á necesaria modificación nese ámbito".

"Non rexeitamos nunha planificación urbana a posibilidade de que exista un uso residencial, outra cousa é que sexa menor do previsto no seu momento, polo que imos avogar pola necesidade de vivendas de protección oficial ou pública, son oportunidades que non podemos refugar".

CONDONACIÓN DA DÉBEDA

A portavoz da Marea expresou a súa preocupación porque a condonación da débeda "estea fóra do diálogo e das ordes do día nas reunións", e lembrou que se demostrou "a súa viabilidade" en Valencia, onde foi condonada a débeda.

Villoslada apoia esta opción, pero cualificouna como "altamente complicada", e considerou que a responsabilidade do Goberno local é buscar "alternativas".

"Nesas solucións alternativas está adquirir chan na zona 1, para nesa chamada realización de activos, sexan de titularidade pública e para que as contas da Autoridade Portuaria evidencien viabilidade á hora de afrontar os pagos", explicou.

Doutra banda, María García falou tamén sobre os peiraos de San Diego e Petroleiros. "Non nos vale esa declaración de que o seu futuro se decidirá máis adiante", aseverou.

A representante da Marea non entende que se fale de "financiamiento sen falar dos usos dos peiraos ou das necesidades do porto".

Villoslada trasladou que na comisión se traballa nas bases dun novo Plan Director de Ordenación dos espazos portuarios. Dixo que é distinto en zona I, cun plan a "curto-medio prazo", que en zona II, que se traballa "cunha perspectiva a longo prazo".

PP

Do mesmo xeito que a Marea Atlántica, Rosa Gallego, portavoz do PP na Coruña, dixo que "a primeira opción é reclamarlle ao Estado que condone a débeda da Autoridade Portuaria como no seu día fixo con Valencia".

"O sucedido en Valencia marca un antes e un despois neste tipo de asuntos e supón unha discriminación inxustificada cara á cidade da Coruña", engadiu a portavoz popular.

Os populares piden a Rey que aplique a máxima transparencia aos movementos que vén efectuando en relación co futuro da fachada marítima.

Rosa Gallego considerou que é un asunto "coa transcendencia suficiente como para que se aborde nos foros adecuados e non en reservados sen luz e taquígrafos" "A alcaldesa ten que abandonar o sectarismo e sentar con todos os portavoces", dixo.

A portavoz popular propón á Marea Atlántica que, no caso de que Inés Rey persista na súa negativa a reunirse cos portavoces, convoque de inmediato a Comisión do Bordo Litoral que preside, "e que sexa nese foro, no que participan todos os grupos, no que se expoñan e valoren todas as propostas que se están manexando".

Durante a súa intervención tras a reunión coa Marea Atlántica, Juan Díaz Villoslada, transmitiu que o goberno local está disposto a ter reunións con todos os grupos que a soliciten "coa máxima transparencia".