Sabucedo prepárase para unha Rapa das Bestas "moi reducida" pola pandemia

A venda de entradas para asistir aos curros realizarase exclusivamente de maneira anticipada en internet.

Por Europa Press / Redacción | Pontevedra | 03/08/2021 | Actualizada ás 17:12

Comparte esta noticia

A Asociación Rapa das Bestas de Sabucedo informou de que a venda ao público das entradas para asistir aos curros do sábado 28 de agosto (18,00 horas) e o domingo 29 (12,00 horas) realizarase exclusivamente de maneira anticipada a través da súa páxina web.

Rapa das Bestas en Sabucedo, en Pontevedra
Rapa das Bestas en Sabucedo, en Pontevedra | Fonte: Álvaro Ballesteros - Europa Press.

Segundo concreta, non se abrirá ata que estea ultimado o protocolo anti covid-19 que se está elaborando para "garantir o cumprimento da normativa sanitaria e priorizar a saúde de todas as persoas implicadas".

A data de apertura da venda en liña anunciarase --ratifica-- nas próximas semanas a través das redes sociais e os medios de comunicación, e o prezo das entradas será de 11 euros máis os gastos de xestión da plataforma de venda.

En todo caso, a asociación xa anticipa que "a capacidade do curro será moi reducida" e que as restricións sanitarias obrigarán tamén a "limitar notablemente" a acreditación de medios e profesionais da comunicación.

Neste sentido, avánzase que o prazo de acreditación tamén se dará a coñecer proximamente nas redes sociais e advírtese que, como norma xeral e agás para casos puntuais autorizados pola asociación, nesta edición non se permitirá aos profesionais gráficos baixar ao curro para captar imaxes entre os cabalos.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta