A Deputación da Coruña adxudica as obras da nova senda ciclista que percorrerá o encoro de Cecebre
Serán 32 novos quilómetros de ruta.
Por Europa Press / Redacción | A CORUÑA | 05/08/2021 | Actualizada ás 19:33
A Deputación da Coruña acolleu este xoves a firma dos contratos para a execución das obras de construción da nova senda ciclista que percorrerá a contorna do encoro de Cecebre, que conectará co concello de Carral.
Trátase de 32 novos quilómetros de ruta que discorrerá polos municipios de Abegondo, Betanzos, Bergondo e Carral, "constituíndo unha alternativa perfecta para coller a bicicleta ou pasear", indica o organismo provincial.
O investimento das obras, cofinanciadas nun 80% con fondos europeos FEDER a través do Instituto para a Diversificación e Aforro da Enerxía (IDAE), ascende a 1.742.073 euros e teñen un prazo de execución de 10 meses, polo que estarán terminadas para o próximo verán.
Por outra banda, a área de Normalización Lingüística e Igualdade da Deputación da Coruña completou a totalidade dos recursos audiovisuais da iniciativa 'Abrandares nas letras. De onte a hoxe'. Trátase de cinco micro-vídeos didácticos que xa están dispoñibles en liña para descarga libre para todo tipo de público.
