Por E.P. | Santiago de Compostela | 07/08/2021 | Actualizada ás 20:45
A directora xeral de Pesca, Acuicultura e Innovación Tecnolóxica, Mercedes Rodríguez, presidiu a comisión de seguimento do plan de xestión do polbo, na que a Xunta e o sector constataron a mellora das capturas no primeiro mes de campaña en relación co ano pasado, así como a abundancia de xuvenís no mar, unha boa mostra da situación biolóxica da especie.
Os datos analizados no encontro mostran que as descargas deste cefalópodo no pasado mes de xullo roldaron os 180.000 quilos, unha cifra que está por riba da media da serie histórica para este mes --que se remonta á campaña 2003/2004-- e multiplican por máis de seis as inscritas no mesmo período do ano pasado.
A evolución da facturación das lonxas galegas pola venda deste produto tamén é boa, pois superou os 1,6 millóns de euros o pasado xullo, unha cifra moi superior á media histórica --de pouco máis dun millón de euros-- e que case multiplica por sete os 235.000 euros conseguidos en xullo do ano pasado.
Esta suba nos ingresos dos centros de primeira venda galegos por esta especie debeuse en boa medida ao incremento do seu prezo medio, que alcanzou os 9,22 euros o quilo, o segundo mellor da serie histórica, só superado polos case 10,6 euros rexistrados en xullo de 2018.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.