As farmacias galegas venden máis de 91.000 test de antíxenos nunha soa semana

As oficinas de farmacia españolas venderon un total de 1.081.554 test de antíxenos contra a COVID-19 na semana do 26 de xullo ao 1 de agosto, a segunda na que estiveron dispoñibles sen receita.  Así, as vendas destes produtos incrementáronse en ata un 637 por cento ao longo desa semana en comparación con cando aínda se necesitaba prescrición médica para acceder a eles. A venda sen receita comezou oficialmente no Estado español o 21 de xullo, tras ser publicada no Boletín Oficial do Estado e aprobada o día anterior no Consello de Ministros.

Cataluña é a comunidade autónoma que lidera a adquisición deste tipo de probas diagnósticas contra a COVID-19, con 212.369 na segunda semana desde o inicio da venda sen receita. De feito, concentra o 29,4 por cento das vendas totais de España no acumulado do ano.

Do 26 de xullo ao 1 de agosto, séguenlle Andalucía (207.074), Madrid (148.044), Comunidade Valenciana (115.912), Galicia (91.039), País Vasco (50.028), Castela e León (48.676), Castela-A Mancha (36.457), Baleares (30.985), Aragón (28.324), Canarias (27.362), Asturias (18.349), Murcia (17.550), Cantabria (14.707), Estremadura (13.047), A Rioxa (11.225) e Navarra (10.404).

Así, tras esta intensiva compra por parte da cidadanía, o 'stock' tras esa segunda semana situouse en 1.371.019 a nivel estatal, cunha clara preponderancia novamente de Cataluña, con 358.260, seguida de Andalucía (260.698). O informe apunta que as farmacias reaccionaron ante a elevada demanda incrementando o seu 'stock' e anticipándose a unha posible rotura. Así mesmo, indican que a aparición de novas marcas de test de antíxenos triplicou " as súas vendas no acumulado do ano".

Unha caixa con test de antígenos contra a COVID-19 nunha farmacia.. Rober Solsona - Europa Press | Fonte: Europa Press