Por E.P. | SANTIAGO DE COMPOSTELA | 09/08/2021 | Actualizada ás 18:30
Hostalaría Compostela prevé que a ocupación hoteleira en Santiago roce o 70% en agosto, tras situarse en torno ao 66% esta ponte de San Roque (días 14, 15 e 16). De acordo cos seus datos, a ocupación en xullo quedou no 60%, polo que a asociación constata a recuperación respecto dos datos de 2020, marcados pola crise do coronavirus.
En declaracións a Europa Press, o directivo de Hostalaría Compostela Carlos Regueiro, do Hotel San Lorenzo, valora unhas cifras que dan ao sector certa "alegría para manterse" despois de recuperar a empregados que estiveron acollidos en expedientes de regulación de emprego temporal (ERTE).
En calquera caso, advirte que aínda se está lonxe de números de anos precovid, nos que en agosto a capital galega adoitaba roldar o 90% de ocupación hoteleira. Ademais, apunta que Santiago "se ve ben" comparativamente con outros destinos como as localidades costeiras, que son as principais no verán, tendo en conta que nestes puntos hai máis restricións polo maior nivel de contaxios de coronavirus.
DIFICULTADES PARA RECUPERAR TURISMO INTERNACIONAL
Pola súa banda, o concelleiro Sindo Guinarte, alcalde en funcións de Santiago, constatou este luns que a pandemia está a dificultar a recuperación do turismo internacional e incidiu en que, cunha quinta onda de especial virulencia, os datos turísticos e de ocupación na capital galega son "aceptables", pero "non óptimos".
Segundo concretou e na liña coas cifras ofrecidas polo sector, en xullo a ocupación roldou aproximiadamente un 60% e en agosto a previsión é que se alcance o 70%. Sendo mellores que o ano pasado, precisou que aínda non se axustan aos de "unha tempada normal". Finalmente, reivindicou que a capital galega "segue sendo un destino seguro" e deu por feito que, se se rexistra unha mellora da situación sanitaria, as cifras de ocupación para setembro serían "máis positivas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.