O Goberno cifra en 683,9 millóns o impacto das súas políticas de transición ecolóxica en Galicia

O delegado do Goberno en Galicia, José Miñones, cifrou en 683,9 millóns de euros o impacto das políticas en materia de transición ecolóxica, de protección do medio ambiente e de apoio á innovación. Detallouno tras profundar no informe de rendición de contas do Goberno 'Cumprindo'.

Segundo precisa a este respecto a Delegación do Goberno, "as políticas vinculadas a estas materias teñen varias partidas destacadas, como os 49,2 millóns de euros para eficiencia enerxética industrial e reforma de edificios residenciais; 39,2 millóns para autoconsumo e sistemas térmicos renovables no sector residencial e 20,4 millóns do Instituto para a Diversificación e Aforro da Enerxía para xeración térmica e eléctrica de fontes renovables".

O Executivo tamén impulsou o Plan MOVES III, para a execución de programas de incentivos ligados á mobilidade eléctrica, con 22,8 millóns de euros, "transferidos á Xunta".

No capítulo de saneamento, no que vai de ano houbo 49,8 millóns de euros para EDAR de Silvouta, en Santiago; 32,2 para o dragado da ría do Burgo, na Coruña; e 19,3 millóns de euros para saneamento e depuración nos concellos de Poio e Sanxenxo, en Pontevedra.

Outra das partidas corresponde ao Programa de Economía Circular e o Plan de Impulso ao Medio Ambiente-PIMA Residuos, con 22,8 millóns de euros en Galicia. Tamén figuran 11,6 millóns para conservación de biodiversidade terrestre e mariña, restauración de ecosistemas e infraestrutura verde e xestión forestal sustentable.

Ademais, os programas de desenvolvemento rural e agroalimentarios tiveron 9,9 millóns para programas vinculados ao marco 2014-2020, 0,7 para o programa escolar de consumo de froitas e hortalizas e 0,5 para o programa escolar de consumo de leite.