Por E.P. | SANTIAGO DE COMPOSTELA | 11/08/2021 | Actualizada ás 17:05
A nova edición dos 'Rías Baixas Filme Fest' celebrarase entre os meses de setembro e decembro, co fin de situar á provincia "como a gran referencia no audiovisual". A presidenta da Deputación de Pontevedra, Carmela Silva presentou este mércores a iniciativa, acompañada por Suso Novás, codirector de Novos Cinemas de Pontevedra, e Teresa Barberena, codirectora do Festival de Cinema Inclusivo de Vigo.
Alí deuse a coñecer o calendario deste ano xunto a representantes de todos os festivais que integran a marca e de integrantes dos gobernos locais de Porriño, Vigo, Bueu, Tui, Vilagarcía e Pontevedra. A mandataria provincial destacou que estes festivais contribúen a converter á provincia nunha referencia cultural polo que agradeceu o "inmenso traballo" dos organizadores destes eventos e do persoal da Deputación implicado.
"Fan felices á nosa xente", insistiu, para destacalos como "un motor de atracción de visitantes" e unha mostra do "talento" do territorio. Os Rías Baixas Filme Fest comezarán no Porriño coa celebración do XVIII Festival de Cans entre o 1 e 4 de setembro e continuarán co X Primavera do Cinema, que terá lugar en Vigo do 7 a 12 de setembro.
Outras citas serán o XIV FicBueu entre o 10 e 19 de setembro en Bueu; o XVII Play-Doc que terá lugar entre o 22 e 26 de setembro en Tui; co Galician Freaky Filme Fest entre o 29 de setembro e 2 de outubro en Vigo; ou o V Festival de Cinema Inclusivo que terá lugar entre o 12 e 16 de outubro en Vigo.
O resto de eventos serán o 49º Curtas Festivais do Imaxinario entre o 22 e 31 de outubro en Vilagarcía; e co V Novos Cinemas que se celebrará entre o 14 e 19 de decembro en Pontevedra, que pechará a edición do 2021 dos Rías Baixas Filme Fest.
SEGURIDADE E PROMOCIÓN
Ademais de lanzar por vez primeira no oito festivais a campaña "Lembra, eu decido, ti respectas", a Deputación continuará colaborando cos protocolos de seguridade anticovid e incrementará a promoción a través da campaña específica "Rías Baixas Filme Fest, que non che conten a película".
Tamén incorporará a promoción dos festivais na feira Culturgal e durante a celebración dos eventos gravará un audiovisual para promover a marca de face ao 2022, ano no que terá lugar a acción "En modo cinema", con charlas gravadas en localizacións da provincia e entrevistas realizadas polos equipos directivos dos Rías Baixas Filme Fest.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.